Ֆրանսիայում լրտեսության գործով SOS Donbass-ի երկու անդամ է ձերբակալվել

Ֆրանսիայի հետախուզական ծառայությունները ձերբակալել են SOS Donbass միավորման երկու անդամի, այդ թվում՝ Ռուսաստանի քաղաքացու, Ռուսաստանի Դաշնության օգտին լրտեսություն կատարելու կասկածանքով, հաղորդում է Parisien թերթը։

Թերթի տվյալներով՝ 40-ամյա Աննա Ն.-ն և 63-ամյա ֆրանսիացի Վինսենթ Պ.-ն նոյեմբերի 17-ին ձերբակալվել են Ներքին անվտանգության գլխավոր վարչության (DGSI) աշխատակիցների կողմից։ Նրանց մեղադրանք է առաջադրվել «օտարերկրյա պետության հետ դավադրության» և «օտարերկրյա պետության համար հետաքրքրություն ներկայացնող տեղեկություններ հավաքագրելու» համար։

Ֆրանսիական իշխանությունները պնդում են, որ կասկածյալները «հավաքագրվել են Ռուսաստանի հետախուզական ծառայությունների կողմից և ենթադրաբար աշխատել են Ֆրանսիայում մարդասիրական գործունեության քողի տակ»։