ՖԻՖԱ-ի նախագահը նոր քաղաքացիություն ունի

Ֆուտբոլի միջազգային ֆեդերացիայի (ՖԻՖԱ) նախագահ Ջանի Ինֆանտինոն հայտնել է, որ Լիբանանի նախագահ Ջոզեֆ Աունն իրեն շնորհել է հանրապետության քաղաքացիություն։ Այս մասին տեղեկանում ենք armsport.am կայքից։

«Հպարտ եմ, որ պաշտոնապես լիբանանցի եմ։ Ինձ համար մեծ պատիվ է ստանալ Լիբանանի քաղաքացիություն նախագահ Ջոզեֆ Աունից, ում հետ այսօր հանդիպել եմ Բեյրութում»,- գրել է Ինֆանտինոն Instagram-ում:

Հանդիպման ընթացքում կողմերը քննարկել են ֆուտբոլի զարգացման հեռանկարները և սպորտի դերը խաղաղության ամրապնդման, կրթության ապահովման և երիտասարդների համար հնարավորություններ ստեղծելու գործում։ Որպես հարգանքի նշան՝ Ինֆանտինոն Լիբանանի նախագահին է նվիրել 2026 թվականի Աշխարհի առաջնության պաշտոնական գնդակը՝ նրա անվանագրությամբ, ինչպես նաև այլ հուշանվերներ։

Լիբանանի ֆուտբոլի ֆեդերացիան (LFA) այս քայլը որակել է որպես խորհրդանշական՝ ընդգծելով Ինֆանտինոյի դերը խաղի զարգացման և լիբանանյան ֆուտբոլին ցուցաբերած աջակցության գործում։

55-ամյա Ջանի Ինֆանտինոն, ով ՖԻՖԱ-ն գլխավորում է 2016 թվականից, ունի նաև Իտալիայի և Շվեյցարիայի քաղաքացիություն։ Նշենք, որ նրա կինը՝ Լինա Ալ-Աշկարը, ծնունդով Լիբանանից է։