Պուտինը հայտարարում է․ ԱՄՆ-ում հասկանում են, որ Ուկրաինայի կարգավորումը «պարզ հարց չէ»

Ռուսաստանի նախագահ Վլադիմիր Պուտինը հայտարարել է, որ Միացյալ Նահանգներում ձևավորվել է որոշակի ըմբռնում այն մասին, որ Ուկրաինայի հակամարտության կարգավորումը բարդ և բազմաշերտ գործընթաց է։ Ինչպես հայտնում է РИА Новости-ն, հայտարարությունն արվել է Ղրղզաստանում՝ Պուտինի և Բելառուսի նախագահ Ալեքսանդր Լուկաշենկոյի հանդիպման ընթացքում։ Լուկաշենկոն իր հերթին նշել է, որ գործընթացը կարող է առաջընթաց ունենալ միայն այն դեպքում, երբ Վաշինգտոնը գիտակցի հարցի բարդությունը։

Պուտինը համաձայնել է այդ դիտարկման հետ՝ նշելով, որ ամերիկյան կողմում «այդպիսի հասկացողություն արդեն կա»։ «Կարծում եմ՝ նման ըմբռնում առկա է։ Հիմա ավելի մանրամասն կքննարկենք»,– ասել է Պուտինը՝ ընդգծելով, որ կողմերը դեռևս չեն մտել խորքային բանակցությունների փուլ։ Ռուսաստանի նախագահի խոսքով՝ կարգավորման հնարավորությունները կախված են ոչ միայն աշխարհաքաղաքական իրավիճակից, այլև ԱՄՆ-ի պատրաստակամությունից՝ ընդունելու ոչ հեշտ որոշումներ։

Ավելի վաղ նախագահի օգնական Յուրի Ուշակովը հայտնել էր, որ Մոսկվան դեռ չի սկսել ԱՄՆ առաջարկած խաղաղության պլանի լուրջ քննարկումը։ Նրա խոսքով՝ ռուսական կողմը միայն ծանոթացել է Վաշինգտոնի ներկայացրած նախագծին, սակայն առարկայական բանակցություններ դեռ չեն եղել։