Մեծ Բրիտանիան զինվորների առողջական խնդիրների պատճառով՝ դադարեցրել է Ajax տրանսպորտային միջոցների օգտագործումը

Մեծ Բրիտանիայի զինված ուժերը ժամանակավորապես դադարեցրել են նոր «Այաքս» զրահապատ մարտական ​​մեքենաների շահագործումը՝ զինծառայողների շրջանում առողջական խնդիրների մասին հաղորդագրություններից հետո, հաղորդում է Sky News-ը՝ հղում անելով Պաշտպանության նախարարության մամուլի խոսնակին։

Մեքենաների օգտագործումը երկու շաբաթով կասեցնելու որոշումը կայացվել է այն բանից հետո, երբ մոտ 30 զինվորներ դիմել են բժշկական օգնության՝ վարժանքներից հետո գանգատվելով լսողության հետ կապված խնդիրներից։

2021 թվականին անցկացված ներքին հետաքննությունը պարզել է, որ հրամանատարությունը և ՊՆ պաշտոնյաները երկու տարի գիտեին «Այաքսի» տեխնիկական խափանումների մասին, որոնք վտանգ էին ներկայացնում զինվորների համար, բայց համապատասխան միջոցներ չէին ձեռնարկել։ Լսողության հնարավոր վնասի մասին առաջին անգամ հաղորդվել է 2018 թվականի դեկտեմբերին, սակայն փորձարկումները շարունակվել են մինչև 2020 թվականի նոյեմբեր։