Ապօրինի պահվող զենք-զինամթերք է հայտնաբերվել․ բացահայտում (տեսանյութ)

Ոստիկանությունը շարունակում է ապօրինի պահվող զենք-զինամթերքի հայտնաբերման և առգրավման աշխատանքը: Վերջին օրերին կամավոր ներկայացված զենքի-զինաթերքի դեպքերի ընտրանին ներկայացնենք մեկ տեսաշարով:

Հոկտեմբերի 27-ին 911 ծառայություն զանգած քաղաքացին հայտնել է, որ պատերազմից բերած զենք-զինամթերք է թողել Դավիթաշենի եկեղեցու մոտ:

Համայնքային ոստիկանության Դավիթաշենի բաժնից մեկնած ծառայողները հայտնաբերել են ինքնաձիգ, նռնականետ, նռնակ և այլ զինամթերք:

***

Հոկտեմբերի 31-ին Ոստիկանության օպերատիվ կառավարման կենտրոն զանգած քաղաքացին հայտնել է, որ պատերազմից հետը բերած զենք-զինամթերքը թողել է Արմավիրից Ծառաշեն տանող ճանապարհի աղբանոցի մոտ:

Համայնքային ոստիկանության Արմավիրի բաժնից մեկնած ծառայողները հայտնաբերել են Կալաշնիկովի մեկ ինքնաձիգ, որսորդական երեք հրացան, գազային մեկ ատրճանակ, պայթուցիչով չորս նռնակ, երեք ական, գնդացրի 110 ու ինքնաձիգի 107 փամփուշտ և այլ զինամթերք:

***

Նոյեմբերի 2-ին 911 զանգած քաղաքացին էլ հայտնել է, որ ինքն էլ պատերազմի մասնակից է, և հետը բերած զենք-զինամթերքը թողնում է Վայք քաղաքում:

Համայնքային ոստիկանության Վայքի բաժնի ծառայողները նշված վայրում հայտնաբերել են ինքնաձիգ և ռազմամթերք։

***

Նոյեմբերի 3-ին Ոստիկանության օպերատիվ կառավարման կենտրոն զանգած քաղաքացին հայտնել է, որ պատերազմից բերած զենք-զինամթերք է թողնում Մառի փողոցի կիսակառույց շենքի մոտ: Նոր Նորքի համայնքային բաժնի ծառայողները հայտնաբերել են Կալաշնիկովի մեկ ինքնաձիգ, երեք նռնակ, փամփուշտներ և Մակարով տեսակի ատրճանակ:

***

Արմավիրի մարզի պարեկների բացատրական աշխատանքի արդյունքում առաջին ահազանգը ստացվել է նոյեմբերի 4-ին: Էջմիածնի ռեստորաններից մեկի հետնամասում հայտնաբերվել է Կալաշնիկովի մեկ ինքնաձիգ և 191 փամփուշտ: Նոյեմբերի 7-ին ստացված ահազանգի հետքով Արմավիրի կաթի գործարան տանող ճանապարհ մեկնած ոստիկանները հայտնաբերել են Կալաշնիկովի մեկ ինքնաձիգ, կարճեցված փողով հրացան, երկու նռնակ, 252 փամփուշտ և այլ զինամթերք:

Հորդորում ենք ապօրինի պահվող զենք-զինամթերքը կամավոր հանձնել իրավապահ մարմիններին: Դրանով դուք կազատվեք քրեական պատասխանատվությունից:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: