Կարողացել ենք 416 կգ թմրամիջոց դուրս բերել ընդհանուր շրջանառությունից. Արփինե Սարգսյան

Քրեական ոստիկանությունը աշխատանքի դրական ազդակներ ունի: Օրինակ՝ հանցավորության դեմ պայքարում կարևորագույն օղակ հանդիսացող թմրամիջոցների ապօրինի շրջանառության դեմ պայքարում ունենք էական նվաճում: Թմրամիջոցների ապօրինի շրջանառության դեպքերի բացահայտման ցուցանիշները 18 տոկոսով աճել են: Այդ մասին հայտարարել է ՆԳ նախարար Արփինե Սարգսյանը:

«Ոչ թե թմրամիջոցներն են շարունակում ահագնացող տեմպեր ունենալ ՀՀ-ում, այլ լատենտային համարվող այս հանցագործության բնույթը նկատի ունենալով` մենք կարողանում ենք օպերատիվ, ճիշտ և գրագետ աշխատանքի արդյունքում բացահայտել այս դեպքերը: Նախորդ տարվա նույն ժամանակամիջոցի համեմատ կրկնակի ավելի կիլոգրամ թմրամիջոց ենք կարողացել առգրավել և դուրս բերել շրջանառությունից:

Վստահ եմ՝ տեղյակ եք, որ քրեական ոստիկանության աշխատանքի տեսանկյունից մենք մեր աշխատանքները կենտրոնացրել ենք ներմուծման և արտադրման շղթան կոտրելու տրամաբանության վրա: Կենտրոնանում ենք մեծ խմբաքանակների վրա, որ հետագայում շատ ավելի ջանք և ռեսուրս չվատնենք փոքր խմբաքանակների հայտնաբերման ուղղությամբ, և հենց այս տրամաբանությամբ է, որ մենք կարողացել ենք 416 կգ թմրամիջոց իրավապահ համակարգի համատեղ ջանքերի արդյունքում դուրս բերել ընդհանուր շրջանառությունից: