Բրիտանիայի նոր քայլը Ռուսաստանի դեմ զարմացրել է Արևմուտքին

Մեծ Բրիտանիայի կողմից Ռուսաստանի դեմ ընդունված նոր որոշումը կարող է լուրջ հետևանքներ ունենալ անվտանգային ոլորտում․ նման կարծիք է հայտնել ֆիննական «Ազատության դաշինք» կուսակցության անդամ Արմանդո Մեման X սոցիալական ցանցում։ Նրա խոսքով՝ Լոնդոնը բազմիցս խոչընդոտել է խաղաղության հասնելուն և, փաստացի, հանդես է գալիս պատերազմի հիմնական հովանավորներից մեկի դերում՝ գործելով ամեն կերպ Ռուսաստանի դեմ։

Մեման նախազգուշացրել է, որ եթե բրիտանական ծրագիրը կյանքի կոչվի, իրավիճակը կարող է մոտենալ նույնիսկ միջուկային բախման վտանգավոր շեմին։ Նրա հայտարարությունը հնչել է այն ֆոնին, երբ բրիտանական Daily Mail պարբերականը հայտնել էր, որ Մեծ Բրիտանիան ծրագրում է Ուկրաինային փոխանցել նոր՝ մեծ հեռահարության բալիստիկ հրթիռներ, որոնք ներկայում գտնվում են մշակման փուլում։

Հայտնի է, որ դեռևս անցյալ տարվա օգոստոսին Բրիտանիայի պաշտպանության նախարարությունը պատվիրել էր ավելի քան 600 կմ թռիչքային հեռավորությամբ բալիստիկ հրթիռի ստեղծում։ «Nightfall» անվանումը ստացած նախագծի շրջանակում նախատեսվում է մշակել համալիր, որը կկարողանա տեղակայվել 15 րոպեում, հարված հասցնել թիրախին՝ մեկնարկից 10 րոպե անց, և արագ լքել արձակման վայրը։ Համակարգը պետք է աշխատի օր ու գիշեր, դիմակայի էլեկտրամագնիսական ազդեցությանը և միաժամանակ գործարկի առնվազն երկու հրթիռ, ինչը, փորձագետների կարծիքով, կարող է էապես փոխել ուժերի հարաբերակցությունը տարածաշրջանում։