Մամուլ․ ԱՄՆ-ն ձեռք է բերել զենք, որը կարող է առաջացնել «Հավանայի սինդրոմ»

ԱՄՆ զինված ուժերն արդեն ունեն սարք, որը, ենթադրաբար, կարող է առաջացնել այսպես կոչված «Հավանայի սինդրոմ»․ այդ մասին գրել է լրագրող, ԱՄՆ Պետդեպարտամենտի և NPR ռադիոկայանի նախկին աշխատակից Սաշա Ինգբերը Substack հարթակում։ Նրա պնդմամբ՝ այդ զենքը ԱՄՆ հատուկ նշանակության ուժերը ձեռք են բերել մի քանի ամիս առաջ իրականացված գործողության ընթացքում, իսկ ներկայում այն գտնվում է Պենտագոնի վերահսկողության տակ։

Ինգբերի խոսքով՝ նա սկսել է հարցումներ կատարել իր աղբյուրների շրջանում այն բանից հետո, երբ սոցիալական ցանցերում հայտնվել էր հարցազրույց մի անձի հետ, որը ներկայացվել էր որպես Վենեսուելայի նախագահ Նիկոլաս Մադուրո-ի անվտանգության ծառայության աշխատակից։ Վերջինս պնդել էր, որ Մադուրոյի ենթադրյալ ձերբակալման փորձի ժամանակ նրա պահպանությունը անհասկանալի մեխանիզմով ժամանակավորապես շարքից դուրս էր բերվել։ Լրագրողի աղբյուրները չեն հստակեցրել, թե որտեղից է ԱՄՆ-ը ստացել այդ սարքը, սակայն նշել են, որ այն արդեն փորձարկվել է։ Ըստ մեկ այլ աղբյուրի՝ զենքը կարող էր ոչ թե գրավվել, այլ պարզապես գնվել։

«Հավանայի սինդրոմի» դրսևորումները՝ գլխապտույտ, սրտխառնոց, գլխացավեր և լսողության խնդիրներ, առաջին անգամ արձանագրվել էին ԱՄՆ դիվանագետների մոտ Կուբայում՝ 2016–2017 թվականներին, ապա՝ Չինաստանում 2018-ին։ Հետագայում նման դեպքեր գրանցվել էին նաև Վիեննայում, Աֆրիկայի մի շարք երկրներում, Տաջիկստանում և Ռուսաստանում։ Չնայած նրան, որ 2023 թվականին ամերիկյան հետախուզական համայնքը եզրակացրել էր, թե սինդրոմը չի եղել օտար պետության ուղղակի ազդեցության հետևանք, ԱՄՆ Սենատի հետախուզության հատուկ հանձնաժողովը կոչ էր արել ուսումնասիրել «ուղղորդված էներգետիկ զենքի» հնարավոր կիրառումը։ Ռուսաստանի ԱԳՆ-ն այդ մեղադրանքները որակել է որպես լիովին անհիմն և աբսուրդ։