Ուկրաինան դրոններով հարվածել է Սև ծովում գտնվող երկու նավթատարի

Ուկրաինայի զինված ուժերի անօդաչու թռչող սարքերը Սև ծովում հարձակվել են երկու նավթատար նավերի վրա՝ Կասպիական խողովակաշարային կոնսորցիումի տերմինալի մերձակայքում։ Այդ մասին հայտնում է РИА Новости-ը՝ հղում անելով աղբյուրին։

Հարձակման հետևանքով վնասվել են «Delta Harmony» և «Matilda» նավթատարների բեռնափոխադրման սարքավորումները։ Ըստ հրապարակման՝ չնայած վնասներին, նավերը չեն կորցրել լողունակությունը և չեն խորտակվել։

Գործակալության տվյալներով՝ հարվածի ենթարկված նավթատարները օգտագործվում էին միջազգային «Tengizchevroil» և «Karachaganak Petroleum Operating» կոնսորցիումների կողմից՝ Ղազախստանից նավթի փոխադրման համար։ Նշվում է, որ այդ ընկերությունները զբաղվում են հանքավայրերի մշակմամբ՝ ամերիկյան կազմակերպությունների մասնակցությամբ։

Ավելի վաղ Ռուսաստանի պաշտպանության նախարարությունը հայտնել էր, որ Ուկրաինան երկրորդ օրն անընդմեջ հարվածներ է հասցրել Ռուսաստանի տարածքին՝ կիրառելով կառավարվող ավիառումբեր։ Մասնավորապես, հունվարի 13-ին արձանագրվել է 11 նման զինամթերքի կիրառություն, իսկ մեկ օր առաջ՝ հունվարի 12-ին, ռուսական հակաօդային պաշտպանությունը խոցել էր հինգ կառավարվող ավիառումբ։