FT․ Եվրոպայում անհանգստացած են՝ արդյոք Թրամփը կշարունակի աջակցել Ուկրաինային խաղաղությունից հետո

Եվրոպական երկրներում աճում է մտահոգությունը, թե արդյոք ԱՄՆ նախագահ Դոնալդ Թրամփը կցանկանա շարունակել աջակցել Ուկրաինային խաղաղության հնարավոր համաձայնագրի ստորագրումից հետո։ Այդ մասին գրում է Financial Times-ը՝ հղում անելով եվրոպական պաշտոնյաներին։

Պարբերականի աղբյուրներից մեկը նշել է, որ առանց ԱՄՆ-ի մասնակցության որևէ անվտանգային նախաձեռնություն չի կարող կյանքի կոչվել՝ այդ թվում Մեծ Բրիտանիայի և Ֆրանսիայի քննարկվող ծրագրերը՝ հրադադարից հետո Ուկրաինայում զորքեր տեղակայելու վերաբերյալ։ «Դեռ պարզ չէ, թե իրականում ինչ վերաբերմունք ունի Թրամփը», — ասել է եվրոպացի պաշտոնյան՝ ընդգծելով Վաշինգտոնի դերի վճռորոշ նշանակությունը։

FT-ի փոխանցմամբ՝ եվրոպացիների անհանգստությունը պայմանավորված է նաև նրանով, որ 2025 թվականի ընթացքում Թրամփը մի քանի անգամ հանդես է եկել ուկրաինական հակամարտության վերաբերյալ կոշտ և, ըստ աղբյուրների, «պրոռուսական» հայտարարություններով։ Ավելի վաղ Թրամփը հայտարարել էր, որ ինքն է Ուկրաինայի նախագահ Վլադիմիր Զելենսկիու ձեռքում մնացած «միակ հաղթաթուղթը», ինչը եվրոպական մայրաքաղաքներում ընդունվել է մեծ զգուշությամբ։