Թրամփը բացատրել է՝ ինչու է Գրենլանդիան կարևոր ԱՄՆ-ի համար

ԱՄՆ նախագահ Դոնալդ Թրամփը հայտարարել է, որ Գրենլանդիան անհրաժեշտ է Միացյալ Նահանգներին ազգային անվտանգության ապահովման համար՝ այնտեղ հակահրթիռային պաշտպանության «Ոսկե գմբեթ» համակարգը տեղակայելու նպատակով։ Այդ մասին նա գրել է Truth Social սոցիալական հարթակում՝ բացատրելով կղզին ԱՄՆ-ին միացնելու իր հետաքրքրվածությունը։

Թրամփի խոսքով՝ Գրենլանդիան «կենսական նշանակություն» ունի «Ոսկե գմբեթ» ծրագրի համար, որն ուղղված է ԱՄՆ-ի պաշտպանունակության ուժեղացմանը։ Նա նաև նշել է, որ ՆԱՏՕ-ն պետք է գլխավորի Գրենլանդիայի ԱՄՆ-ին միացնելու գործընթացը՝ ընդգծելով, որ Հյուսիսատլանտյան դաշինքը «ավելի հզոր և արդյունավետ» է դառնում, երբ կղզին գտնվում է Վաշինգտոնի վերահսկողության տակ։

Ավելի վաղ ՆԱՏՕ-ի գլխավոր քարտուղար Մարկ Ռյուտեն հերքել էր ռուսական կամ չինական նավերի ներկայությունը Գրենլանդիայի ափերի մոտ՝ հակառակ Թրամփի հայտարարություններին։ Միևնույն ժամանակ Սպիտակ տան մամուլի քարտուղար Քերոլայն Լևիտը հունվարի 12-ին հայտարարել էր, որ Գրենլանդիայի նկատմամբ ԱՄՆ-ի հետաքրքրությունը պայմանավորված է Ռուսաստանի և Չինաստանի հետ գլոբալ մրցակցությամբ։