Ինչո՞ւ են Հայր Ասողիկին հարցաքննության կանչել․ թեման 7 տարվա վաղեմություն ունի

Քննչական կոմիտեում Մայր Աթոռ Սուրբ Էջմիածնի արխիվի և թանգարանների տնօրեն Ասողիկ աբեղա Կարապետյանի հարցաքննությունը շուրջ 6 ժամ է տևել, իսկ թեման նոր չէ, շրջանառվում է արդեն շուրջ 7 տարի և վերաբերում է Մայր Աթոռում պահվող Սուրբ Գեղարդի վնասվելուն և պատմամշակութային մյուս արժեքների կորստի, փոփոխության հարցին։

Այս մասին ասել է  նրա պաշտպան Մարինե Ֆարմանյանը։

«Հայր Ասողիկի դիրքորոշումն, իհարկե, չի փոխվել, ինչպես 7 տարի առաջ լրատվամիջոցների հետ զրույցում էր ասել, այսօր էլ կրկնեց՝ Գեղարդն անվնաս է և պահվում է Մայր աթոռում այնպես, ինչպես դարեր շարունակ է եղել»,- նշեց Ֆարմանյանը։

Նրա խոսքով՝ հայր Ասողիկն այս թեմայով առաջին անգամ է հարցաքննության հրավիրվում։ Այն, որ 7 տարի անց այս անհեթեթ թեման կրկին շրջանառության մեջ է դրվելու, ըստ Ֆարմանյանի, ակնհայտ էր վերջին օրերին իշխող ուժի արբանյակների կողմից դաշտ նետված տեսանյութերից և հրապարակումներից, որոնք վերաբերում էին Սուրբ Գեղարդի վնասված լինելուն։