Առաջարկվում է կարգավորել պաշտամունքային կառույցների օտարման իրավահարաբերությունները

Օրենսդրական նախաձեռնության նպատակն է կարգավորել պետության և հասարակության համար մեծարժեք նշանակություն ունեցող որոշակի հուշարձանների, մասնավորապես, պաշտամունքային կառույցների օտարման իրավահարաբերությունները: Այդ մասին հայնում են ԱԺ-ից:

Պատգամավորներ Թագուհի Ղազարյանի և Սիսակ Գաբրիելյանի հեղինակած ««Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքում փոփոխություն կատարելու մասին» և կից ներկայացված օրենքների նախագծերի փաթեթն առաջին ընթերցմամբ քննարկվել է ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի՝ հունվարի 14-ի հերթական նիստում:

Հիմնական զեկուցող Թագուհի Ղազարյանի ներկայացմամբ առաջարկվող փոփոխությունները բխում են հուշարձանների նկատմամբ վարած պետական քաղաքականությունից: Հիմք ընդունելով պաշտամունքային կառույցների առանձնահատկությունները, դրանց ինքնատիպությունը՝ կարևորվել է օտարման դեպքում ապահովել հնարավորություն Կառավարությանը համաձայնություն տալու կամ մերժելու գույքային իրավունքները հատուցմամբ կամ անհատույց փոխանցելու վերաբերյալ գործարքները:

Հարակից զեկուցող, ՀՀ արդարադատության նախարարի տեղակալ Տիգրան Դադունցը նշել է, որ Կառավարությունը ներկայացված օրենսդրական փաթեթի վերաբերյալ սկզբունքային առարկություններ չունի՝ հավելելով, որ այն տրամաբանական շարունակությունն է գործող օրենքներում առկա կարգավորումների:

Օրենսդրական նախաձեռնությունը ստացել է դրական եզրակացություն: Այն առաջարկվել է ներառել 11-րդ նստաշրջանի և ԱԺ առաջիկա հերթական նիստերի օրակարգերի նախագծերում: