Եվրոպան կրճատել է ռուսական գազի գնումները՝ հասնելով հնգամյա նվազագույնին

Եվրամիությունը 2025 թվականի հունվարից մինչև նոյեմբեր ընկած ժամանակահատվածում 6 տոկոսով նվազեցրել է Ռուսաստանի կողմից մատակարարվող խողովակաշարային գազի և հեղուկացված բնական գազի (LNG) գնումները։ Այդ մասին, հղում անելով Եվրոստատի տվյալներին, հայտնում է ՏԱՍՍ-ը։

Վիճակագրության համաձայն՝ 2025 թվականի նոյեմբերին Ռուսաստանը զբաղեցրել է երրորդ տեղը Եվրոպայի գազի ներմուծման ընդհանուր արժեքի ցուցանիշով։ Առաջին և երկրորդ տեղերում հայտնվել են համապատասխանաբար ԱՄՆ-ն և Ալժիրը։ Նույն ամսին Եվրամիությունը ռուսական գազի համար վճարել է վերջին հինգ տարվա ամենացածր գումարը՝ ընդհանուր առմամբ 752,5 միլիոն եվրո։ Դրանից 415 միլիոն եվրոն բաժին է ընկել խողովակաշարային գազին, իսկ 337 միլիոնը՝ LNG-ին, ինչը նվազագույն ցուցանիշ է 2023 թվականի օգոստոսից ի վեր։

Միևնույն ժամանակ Եվրոպայում շարունակվում է գազի պաշարների կրճատումը ստորգետնյա պահեստարաններում։ Gas Infrastructure Europe-ի տվյալներով՝ հունվարի 12-ին գազի դուրսբերումը կազմել է մոտ 900 միլիոն խմ, իսկ ընդհանուր պաշարները նվազել են մինչև 53 տոկոս։ Նման մակարդակ նախորդ տարի արձանագրվել էր միայն փետրվարի սկզբին, ինչը վկայում է էներգետիկ շուկայի լարվածության պահպանման մասին։