Մերցը կոչ է արել գերմանացիներին ավելի շատ աշխատել՝ օրինակ բերելով շվեյցարացիներին

Գերմանիայի կանցլեր Ֆրիդրիխ Մերցը քննադատել է գերմանացիների վերաբերմունքը աշխատանքի նկատմամբ և հայտարարել, որ գործող աշխատանք–կյանք հավասարակշռության պայմաններում երկրի բարեկեցությունը հնարավոր չի լինի պահպանել։ Նրա խոսքերը փոխանցում է ՏԱՍՍ-ը՝ հղում անելով գերմանական NTV հեռուստաալիքին։

Կանցլերի խոսքով՝ Գերմանիայի տնտեսության արտադրողականությունը բավարար մակարդակի վրա չէ։ Մերցը նշել է, որ Շվեյցարիայի բնակիչները տարեկան միջինը մոտ 200 ժամով ավելի են աշխատում, քան գերմանացիները, և ընդգծել, որ երկրների քաղաքացիների միջև «գենետիկական տարբերություններ» չկան։ Նրա գնահատմամբ՝ Գերմանիայում աշխատանքային ծախսերը չափազանց բարձր են, և այդ ցուցանիշը անհրաժեշտ է նվազեցնել։

Մերցը պարբերաբար բարձրացնում է աշխատանքի ցածր արտադրողականության և բարձր հարկաբյուջետային ու բյուրոկրատական բեռի խնդիրը։ Անցած տարվա օգոստոսին նա հայտարարել էր, որ Գերմանիան այլևս չի կարող իրեն թույլ տալ նույն ծավալով ֆինանսավորել սոցիալական պետությունը․ այդ հայտարարությունը դրական արձագանք էր ստացել նաև Wall Street Journal-ի կողմից, որտեղ այն բնութագրվել էր որպես ժամանակակից Արևմուտքում «տաբու թեմայի» բարձրաձայնում։