Թրամփի «պետական կապիտալիզմը» հասել է Վենեսուելայի նավթին՝ CNN-ի վերլուծություն

CNN-ի վերլուծության համաձայն՝ Դոնալդ Թրամփը Վենեսուելայի նավթը դիտարկում է որպես միլիարդավոր դոլարների ֆինանսական ռեսուրս, որը կարող է վերահսկվել ԱՄՆ նախագահի կողմից։ Թրամփը հայտարարել է, որ Վենեսուելայի ժամանակավոր իշխանությունները ԱՄՆ-ին կհանձնեն 30–50 միլիոն բարել նավթ, որը կվաճառվի շուկայական գներով, իսկ ստացված գումարները կգտնվեն իր վերահսկողության ներքո՝ իբր Վենեսուելայի և ԱՄՆ քաղաքացիների շահերի համար։ Սպիտակ տունը պնդում է, որ միջոցները կպահվեն ԱՄՆ-ի վերահսկողության տակ գտնվող միջազգային բանկերում։

CNN-ը նշում է, որ վարչակազմը փորձում է մշակել Վենեսուելայի նավթի շուրջ ժամանակավոր ռազմավարություն՝ չապակայունացնելու երկիրը։ Ըստ աղբյուրների՝ նավթի վաճառքը կարող է իրականացվել ոչ թե ԱՄՆ ֆինանսների նախարարության, այլ միջազգային նավթային թրեյդերների և օֆշորային բանկային հաշիվների միջոցով։ Միաժամանակ ԱՄՆ պետքարտուղար Մարկո Ռուբիոն հայտարարել է, որ նավթի վերահսկումը Վաշինգտոնի համար լծակ է՝ Վենեսուելայի նոր իշխանություններին կառավարելու համար, իսկ եկամուտները չեն հասնի նախկին ռեժիմին։

Վերլուծաբանների կարծիքով՝ Թրամփի այս մոտեցումը պետական իշխանության և մասնավոր բիզնեսի աննախադեպ խառնուրդ է, որը շրջանցում է Կոնգրեսի ավանդական վերահսկողությունը պետական ֆինանսների նկատմամբ։ Թեպետ Սպիտակ տունը պնդում է, որ գործողությունները հարկատուներին ոչինչ չեն արժենա, CNN-ը շեշտում է՝ այս քաղաքականությունը նոր հարցեր է առաջացնում ԱՄՆ արտաքին քաղաքականության, իրավական սահմանների և Վենեսուելայի նավթային ապագայի շուրջ։