ԱՄՆ-ում իրանցի պաշտոնյաներին համեմատել են «նավից փախչող առնետների» հետ

ԱՄՆ ֆինանսների նախարար Սքոթ Բեսենթը հայտարարել է, որ Վաշինգտոնը հետևում է, թե ինչպես են իրանցի պաշտոնյաները զանգվածային հակակառավարական բողոքների ֆոնին երկրից դուրս բերում ֆինանսական միջոցներ՝ «նավից փախչող առնետների» նման։ Այդ մասին նա ասել է Newsmax-ին տված հարցազրույցում՝ կոշտ ձևակերպումներով նկարագրելով Իրանում ստեղծված իրավիճակը։

Բեսենթի խոսքով՝ խոսքը միլիոնավոր,նույնիսկ տասնյակ միլիոնավոր դոլարների մասին է, որոնք գաղտնի կերպով դուրս են բերվում Իրանից և փոխանցվում տարբեր երկրների բանկերին ու ֆինանսական կառույցներին։ Նա ընդգծել է, որ ԱՄՆ-ը հետևում է այդ միջոցների շարժին՝ թե՛ բանկային համակարգի, թե՛ թվային ակտիվների միջոցով։

Միաժամանակ ԱՄՆ ֆինանսների նախարարը վստահեցրել է, որ իրանցի պաշտոնյաներին չի հաջողվի պահպանել դուրս բերված գումարները։ Ավելի վաղ Իրանի դեսպանն Իսլամաբադում հայտնել էր, որ նախագահ Դոնալդ Թրամփը փոխանցել է՝ ԱՄՆ-ը չի ծրագրում հարձակում Իրանի վրա՝ չնայած երկրում ընթացող բողոքների վերաբերյալ հնչող քննադատություններին։