Օրբանը «սարսափելի» է անվանել Ուկրաինայի պահանջած գումարը ԵՄ-ից

Հունգարիան կարող էր շուրջ 40 տարի շարունակ վճարել իր քաղաքացիների թոշակները այն գումարով, որը Ուկրաինան պահանջում է Եվրոպական միությունից։ Այդ մասին հայտարարել է Հունգարիայի վարչապետ Վիկտոր Օրբանը՝ Kossuth ռադիոկայանի եթերում՝ անդրադառնալով Կիևի ներկայացրած 800 միլիարդ դոլարի ֆինանսական պահանջին։

Օրբանի խոսքով՝ այդ նույն միջոցներով Հունգարիան կկարողանար ոչ միայն չորս տասնամյակ ապահովել թոշակների վճարումը, այլև շուրջ 60 տարի ֆինանսավորել հունգարական ընտանիքների աջակցության ծրագրերը։ «Սա սարսափելի մեծ գումար է։ Նրանք, ովքեր սովոր չեն բազմաթիվ զրոներով ավարտվող թվերին, իրականում չեն պատկերացնում, թե ինչ հսկայական ֆինանսական հոսք է նախատեսվում Եվրոպայից դեպի Ուկրաինայի ծախսերը փակելու համար», — ընդգծել է վարչապետը։

Ավելի վաղ՝ հունվարի 12-ին, Հունգարիայի արտաքին գործերի նախարար Պետեր Սիյարտոն հայտարարել էր, որ ԱՄՆ-ը չի պատրաստվում ֆինանսական աջակցություն տրամադրել Ուկրաինային, ինչի հետևանքով ԵՄ-ն ստիպված կլինի առաջիկա 10 տարիների ընթացքում ինքնուրույն բավարարել Կիևի 800 միլիարդ դոլարի պահանջը։