Ռուս դիվանագետը բարձր է գնահատել ՄԱԳԱՏԷ-ի դերը հրադադարի հաստատման հարցում

Ռուսաստանի մշտական ներկայացուցիչը միջազգային կազմակերպությունների մոտ Վիեննայում Միխայիլ Ուլյանովը բարձր է գնահատել Ատոմային էներգիայի միջազգային գործակալության (ՄԱԳԱՏԷ) գործունեությունը՝ նշելով, որ կառույցը բազմիցս հաջողությամբ նպաստել է տեղային հրադադարների հաստատմանը։ Այս մասին նա գրել է X սոցիալական հարթակում։

Ուլյանովի խոսքով՝ սա առաջին դեպքը չէ, երբ ՄԱԳԱՏԷ-ի միջնորդությամբ հնարավոր է դարձել ժամանակավոր հրադադար ապահովել՝ վերականգնողական աշխատանքներ իրականացնելու նպատակով։ Նա ընդգծել է, որ գործակալությունը արդյունավետ դեր է խաղում նման տեխնիկական ու հումանիտար խնդիրների լուծման գործում։

Ավելի վաղ ՄԱԳԱՏԷ-ն պայմանավորվածություն էր ձեռք բերել Ուկրաինայի և Ռուսաստանի հետ՝ Զապորոժիեի ատոմակայանի տարածքում ժամանակավոր հրադադար սահմանելու վերաբերյալ։ Սա թույլ կտա սկսել 330 կիլովոլտ լարում ունեցող վերջին պահուստային էլեկտրահաղորդման գծի վերանորոգումը, որը վնասվել և անջատվել էր հունվարի 2-ին ռազմական գործողությունների հետևանքով։