«Սպարտակը» մերժել է սերբական «Ցրվենա Զվեզդայի» առաջարկը Մարկինյոսի տեղափոխության հարցում

Մոսկվայի «Սպարտակը» հրաժարվել է վաճառել բրազիլացի հարձակվող Մարկինյոս Կոստային սերբական «Ցրվենա Զվեզդա» ակումբին։ MaxBet Sport-ի հաղորդմամբ՝ սերբական կողմը ֆուտբոլիստի համար առաջարկել է հինգ միլիոն եվրո, սակայն մոսկովյան ակումբը այդ գումարը բավարար չի համարել։

Աղբյուրի տեղեկություններով՝ «Սպարտակը» հույս ունի ֆուտբոլիստի տեղափոխությունից ստանալ առնվազն ութ միլիոն եվրո։ Նշվում է, որ «Ցրվենա Զվեզդայի» գլխավոր մարզիչը սերբ մասնագետ Դեյան Ստանկովիչն է, որը նախկինում գլխավորել է նաև «Սպարտակը» և մինչ այդ աշխատել Մարկինյոսի հետ հունգարական «Ֆերենցվարոշում»։

26-ամյա Մարկինյոսը «Սպարտակում» հանդես է գալիս 2024 թվականից։ Ընթացիկ մրցաշրջանում Ռուսաստանի Պրեմիեր լիգայում նա մասնակցել է 16 հանդիպման՝ խփելով երկու գոլ և կատարելով երեք արդյունավետ փոխանցում։ Ֆուտբոլիստի տրանսֆերային արժեքը գնահատվում է վեց միլիոն եվրո։