ԱՄՆ-ում դատավորը հրաժարական է տվել՝ Էլվիս Փրեսլիի կերպարով հանդես գալու պատճառով

ԱՄՆ-ի Միսուրի նահանգում դատավոր Մեթյու Թորնհիլը կորցրել է իր պաշտոնը՝ դատարանում ոչ պրոֆեսիոնալ վարքագծի վերաբերյալ բազմաթիվ բողոքներից հետո։ Dangerous Minds-ի փոխանցմամբ՝ փորձառու դատավորը նիստերին հաճախ ներկայացել է Էլվիս Փրեսլիի ոճով սանրվածք հիշեցնող պարիկով և սմարթֆոնով միացրել է երգչի հայտնի երգերը՝ փորձելով, իր խոսքով, թեթևացնել մթնոլորտը։

Դիսցիպլինար հանձնաժողովի ուսումնասիրությունը ցույց է տվել, որ նման պահվածքը խաթարում է դատական գործընթացի լրջությունն ու արժանապատվությունը։ Նշվում է, որ Թորնհիլը նիստերի ընթացքում նաև կատակներ է արել՝ կապված Փրեսլիի ծննդյան և մահվան տարեթվերի հետ, ինչպես նաև մեջբերել է երգերի տեքստեր, ինչը, ըստ հանձնաժողովի, կարող էր ազդել դատական գործերի ընթացքի վրա։

2025 թվականի նոյեմբերի 12-ին ուղարկված նամակում Թորնհիլը ընդունել է մեղադրանքները և հրաժարվել է դրանք վիճարկելուց՝ համաձայնելով վաղաժամ հրաժարական տալ 20 տարվա ծառայությունից հետո։ Dangerous Minds-ը հայտնում է, որ նախկին դատավորը նաև դատարանի նիստերն օգտագործել է նախընտրական քարոզչության համար՝ հետաքրքրվելով մասնակիցներից, տեսե՞լ են արդյոք իր գովազդային թերթիկները, և այժմ մտադիր է սկսել քաղաքական կարիերա։