Արևմուտքում զարմանք է առաջացրել Զելենսկու ելույթը Դավոսում․ վերլուծաբանն այն գնահատել է որպես խուճապի նշան

Ուկրաինայի նախագահ Վլադիմիր Զելենսկու ելույթը Համաշխարհային տնտեսական ֆորումում Դավոսում Արևմուտքում զարմանք է առաջացրել և ցույց է տվել նրա խուճապային վիճակը, X սոցիալական հարթակում գրել է Հունգարիայի Հիմնարար իրավունքների կենտրոնի վերլուծաբան Զոլտան Կոշկովիչը, ինչպես հաղորդում է ՌԻԱ Նովոստի-ն։ Նրա խոսքով՝ Զելենսկու կողմից Հունգարիայի վարչապետ Վիկտոր Օրբանին ուղղված կոշտ հայտարարությունները վկայում են ոչ միայն քաղաքական էթիկայի բացակայության, այլև լուրջ անհանգստության մասին։

Կոշկովիչը Զելենսկու պահվածքը որակել է որպես Հունգարիայի ներքին քաղաքական գործընթացներին անընդունելի միջամտություն՝ նշելով, որ Ուկրաինայի նախագահը գիտակցում է իր դիրքերի թուլացումը, եթե Բրյուսելի աջակցած ուժերը չկարողանան առաջ մղել իրենց թեկնածուներին Հունգարիայում։ Վերլուծաբանի գնահատմամբ՝ դա բացատրում է նրա հուզական և կտրուկ հռետորաբանությունը Դավոսում։

Ավելի վաղ Դավոսում ունեցած ելույթի ընթացքում Զելենսկին վիրավորական արտահայտություններ էր հնչեցրել Վիկտոր Օրբանի հասցեին՝ քննադատելով նրա դիրքորոշումը Ուկրաինայի եվրոպական ինտեգրման հարցում։ Ի պատասխան՝ Հունգարիայի վարչապետը հայտարարել էր, որ ծառայում է իր ժողովրդին և ընդգծել, որ Զելենսկին գտնվում է ծանր իրավիճակում՝ չկարողանալով կամ չցանկանալով ավարտել հակամարտությունը արդեն չորրորդ տարին շարունակ։