CNN․ Մադուրոյի ձերբակալության գործողությունը ԱՄՆ-ի համար եղել է ծայրահեղ վտանգավոր

ԱՄՆ-ի կողմից Վենեսուելայի նախագահ Նիկոլաս Մադուրոյին ձերբակալելու գործողությունը ուղեկցվել է աննախադեպ ռիսկերով, հատկապես վերջին փուլում, երբ ամերիկյան ուղղաթիռները իջել են Կարակասում գտնվող խիստ ամրացված ռազմական համալիրում, գրում է CNN-ը՝ հիմնվելով տասնյակ տեսագրությունների և լուսանկարների վերլուծության վրա։ Ըստ հեռուստաընկերության՝ ամենավտանգավոր պահը եղել է այն կարճ ժամանակահատվածը, երբ տեղափոխող ուղղաթիռը գետնին էր՝ շարունակվող փոխհրաձգության պայմաններում։

CNN-ի տվյալներով՝ գործողությունը սկսվել է հունվարի 3-ի գիշերը՝ Վենեսուելայի հակաօդային պաշտպանության, կապի և ռադարային համակարգերի դեմ լայնածավալ հարվածներով։ Դրանից հետո հատուկ նշանակության ուժերի ուղղաթիռները ներխուժել են Ֆորտ Տիունա ռազմական համալիր, որտեղ, ըստ վերլուծության, գտնվում էր Մադուրոյի ենթադրյալ դուրսբերման կետը։ Վերջնական փուլում ամերիկյան ուժերը բախվել են ինտենսիվ կրակի՝ թե՛ գետնից, թե՛ օդից, ինչը մասնագետները որակել են որպես գործողության ամենախոցելի պահը։

CNN-ի վերլուծաբանների և ռազմական փորձագետների գնահատմամբ՝ նման գործողությունը կարող էր ցանկացած պահի ձախողվել, քանի որ ուղղաթիռների վայրէջքն ու օդ բարձրանալը կատարվել են հակառակորդի անմիջական կրակի ներքո։ Չնայած գործողության հաջող ավարտին՝ փորձագետները ընդգծում են, որ այն իրականացվել է «վայրկյանների հաշվարկով» և հիշեցնում է, թե որքան վտանգավոր է օտար պետության տարածքում գործող նախագահին ուժով դուրս բերելու փորձը, նշում է CNN-ը։