Բազմակողմանի և օբյեկտիվ քննություն չի կատարվել, իրավական որակումները սխալ են տրվել․ Վալոդյա Գրիգորյանի հայր

«Պաշտպանի կողմից արտահայտած դատողությունների վերաբերյալ շատ հակիրճ կխոսեմ»,- Փարաքարի համայնքապետ Վալոդյա Գրիգորյանի սպանության գործով դատական նիստին ասաց Վալոդյա Գրիգորյանի հայրը՝ Լևոն Գրիգորյանը։

«Ես համաձայն եմ պաշտպանի կողմից արտահայտած  այն դատողությանը, որ սույն քրեական վարույթը շատ կարճ ժամանակում  արարտվել և ներկայացվել դատարան, բազմակողմանի, համակողմանի և լրիվ  օբյեկտիվ քննություն պետք է կատարվեր։ Տուժողի կողմը՝ մենք, այն կարծիքն ունենք, որ շատ արագ է, ինչ-որ այս գործը ընթանում՝ քննությունն ավարտվում է քրեական  նյութերով ուղարկվում է, ընդհանուր առմամբ 100 օրվա ընթացքում։ Մեր մտահոգությունն այն է, որ այս ամենը շատ արագ է կատարվել, բազմակողմանի և օբյեկտիվ քննություն չի կատարվել,  իրավական որակումները սխալ են տրվել»,- ասաց նա։

Հիշեցնենք, որ այսօր Երևանի քրեական դատարանում  տեղի է ունենում Փարաքարի համայնքապետ Վոլոդյա Գրիգորյանի ու նրա ոստիկան ընկերոջ Կարեն Աբրահամյանի սպանության գործով առաջին դատական նիստը։ Քրեական գործը դատարան ստացվել է հունվարի 12-ին։ Նույն օրը 28 փաթեթ իրեղեն ապացույցի հետ այն հանձնվել է Երևանի քրեական դատարանի դատավոր Մուշեղ Արամյանին։

Գործով անցնում է երկու մեղադրյալ։ Նարեկ Օհանյանին մեղադրանք է առաջադրվել այն բանի համար, որ նա հանցագործության միջոցները կամ գործիքները, հանցագործության հետքերը նախապես խոստացված պարտակելու եղանակով օժանդակել է իր համագյուղացի և ընկեր Գևորգ Հարությունյանին՝ 2025 թվականի սեպտեմբերի 23-ին՝ ժամը 23:43-ին, Վալոդյա Գրիգորյանին և Կարեն Աբրահամյանին վրեժի շարժառիթով ապօրինաբար կյանքից զրկելուն՝ սպանելուն, իսկ Արծրուն Գալստյանի նկատմամբ սպանության փորձ կատարելուն՝ պայմանավորված իր հարազատ եղբոր՝ Գրիգոր Սոսի Օհանյանի, 2025թ. փետրվարի 5-ին Մերձավանում տեղի ունեցած վիճաբանության ժամանակ սպանության հանգամանքով: