Իսրայելը «հնարավորություն է փնտրում» հարվածելու Իրանին. Ֆիդան

Թուրքիայի արտաքին գործերի նախարար Հաքան Ֆիդանը հայտարարել է, որ կան հստակ նշաններ, ըստ որոնց Իսրայելը փորձում է հարմար պահ գտնել Իրանի դեմ ռազմական հարված իրականացնելու համար՝ նախազգուշացնելով, որ նման քայլը կարող է ավելի խորացնել տարածաշրջանային անկայունությունը։ «Հույս ունեմ՝ նրանք այլ ուղի կընտրեն, սակայն իրականությունն այն է, որ հատկապես Իսրայելը հնարավորություն է փնտրում հարվածելու Իրանին», — ասել է Ֆիդանը թուրքական NTV հեռուստաալիքին տված հարցազրույցում։

Նրա խոսքով՝ վերջին օրերին Թեհրան կատարած այցի ընթացքում ինքը այս մտահոգությունները բաց ու անմիջական ձևով փոխանցել է Իրանի ղեկավարությանը։ «Երբ ես եղա Թեհրանում, որպես ընկեր՝ ասացի ամեն ինչ գործընթացի մասին։ Իսկ ընկերը պարտավոր է ասել նաև դառը ճշմարտությունը», — նշել է Թուրքիայի արտգործնախարարը։ Ֆիդանի հայտարարությունները հնչել են այն բանից հետո, երբ Թուրքիայի նախագահ Ռեջեփ Թայիփ Էրդողանը հեռախոսազրույցում Իրանի նախագահ Մասուդ Փեզեշքիանին վստահեցրել է, որ Անկարան դեմ է Իրանի նկատմամբ ցանկացած արտաքին միջամտության և կարևորում է հարևան երկրի խաղաղությունն ու կայունությունը, գրում է Al-JAZEERA լրատվական կայքը։

Միևնույն ժամանակ, Իրանի բարձրաստիճան պաշտոնյան Reuters գործակալությանը հայտնել է, որ Թեհրանը ցանկացած հարձակում կդիտարկի որպես «լիակատար պատերազմ» իր դեմ։ Նրա խոսքով՝ ԱՄՆ-ի կողմից իրականացվող ռազմական կուտակումները լուրջ մտահոգություն են առաջացնում, թեև Իրանը հույս ունի, որ դրանք իրական բախման չեն հանգեցնի։ «Եթե խախտվի Իրանի ինքնիշխանությունն ու տարածքային ամբողջականությունը, մենք կպատասխանենք ամենախիստ ձևով», — ընդգծել է պաշտոնյան՝ հավելելով, որ Իրանի զինված ուժերը գտնվում են բարձր պատրաստվածության վիճակում։