Թրամփին սպառնացել են իմպիչմենտով՝ Գրենլանդիայի խնդրի պատճառով

ԱՄՆ նախագահ Դոնալդ Թրամփը կարող է կանգնել իմպիչմենտի վտանգի առաջ, եթե փորձի Գրենլանդիան գրավել ռազմական ճանապարհով։ Այս մասին հայտնում է Reuters-ը՝ հղում անելով իր աղբյուրներին։ Ըստ հրապարակման՝ Թրամփի վարչակազմին զգուշացրել են, որ նման սցենարի դեպքում Կոնգրեսում կարող է նախաձեռնվել նախագահի իմպիչմենտի գործընթաց։

Reuters-ի տվյալներով՝ ԱՄՆ-ը ամբողջությամբ չի հրաժարվել Արկտիկայում ռազմական ներգրավման գաղափարից, չնայած Կոնգրեսի որոշ անդամների լուրջ մտահոգություններին։ Հրապարակման մեջ նշվում է, որ վարչակազմը, կարծես, կրկին առաջ է մղում լայնածավալ ռազմական գործողության գաղափարը՝ առանց Կոնգրեսի հետ նախնական խորհրդակցությունների։

Գործակալությունը ընդգծում է, որ Թրամփին հստակ փոխանցվել է՝ եթե Գրենլանդիայի հարցում կիրառվեն ԱՄՆ զինված ուժերը, Կոնգրեսը կարող է սկսել իմպիչմենտի գործընթաց։ Միևնույն ժամանակ նշվում է, որ Գրենլանդիայի ռազմական գրավումը ներկայում լուրջ կերպով չի դիտարկվում։ Ավելի վաղ Reuters-ը նաև հաղորդել էր, որ ՆԱՏՕ-ի գլխավոր քարտուղար Մարկ Ռյուտտեն Թրամփի հետ բանակցություններում գործել է «սուզանավի սկզբունքով»՝ մնալ ստվերում և միջամտել միայն ծայրահեղ անհրաժեշտության դեպքում։