Արևմտյան մամուլը գնահատել է ՍՎՕ-ում կիրառված խորհրդային Х-22 հրթիռների արդյունավետությունը

Ռուսաստանի զինված ուժերի կողմից հատուկ ռազմական գործողության ընթացքում կիրառված խորհրդային արտադրության Х-22 («Բուրա») հրթիռները գրեթե անհնար է խոցել։ Այդ գնահատականը ներկայացրել է արևմտյան Military Watch Magazine (MWM) հանդեսը՝ անդրադառնալով վերջին հարվածներին։

Հանդեսը հիշեցնում է, որ Х-22 հրթիռները ստեղծվել են ավելի քան կես դար առաջ և առաջին անգամ Կիևի էներգետիկ օբյեկտների դեմ կիրառվել են հունվարի 24-ին։ Հրապարակման համաձայն՝ քաղաքում արձանագրվել է առնվազն 12 հաջող հարված, իսկ նման հրթիռների միակ կրողներն այսօր մնում են Տու-22Մ3 ռազմավարական ռմբակոծիչ-հրթիռակիրները։ MWM-ն նաև մեջբերում է Ուկրաինայի ռազմաօդային ուժերի հրամանատարության խոսնակ Յուրի Իգնատի խոսքերը, ով ավելի վաղ ընդունել էր, որ առկա միջոցներով Х-22-ը գրեթե հնարավոր չէ խոցել։

Ըստ հանդեսի՝ հրթիռի «անխոցելիությունը» պայմանավորված է նրա բարձր արագությամբ, որը հասնում է մինչև 4,6 Մախի, ինչպես նաև թռիչքի անկանխատեսելի ուղեծրով։ Միևնույն ժամանակ MWM-ն նշում է, որ Х-22-ի թերություններից մեկն այն է, որ նրա ուղղորդման համակարգը մշակվել է դեռևս XX դարի կեսերին և համարվում է տեխնիկապես հնացած։