Գերմանիայի պաշտպանության նախարարը պահանջել է, որ Թրամփը ներողություն խնդրի ՆԱՏՕ-ի դաշնակիցների մասին խոսքերի համար

Գերմանիայի պաշտպանության նախարար Բորիս Պիստորիուսը կոչ է արել ԱՄՆ նախագահ Դոնալդ Թրամփին հրապարակային ներողություն խնդրել ՆԱՏՕ-ի դաշնակիցների հասցեին արված հայտարարությունների համար՝ կապված Աֆղանստանում իրականացված գործողությունների հետ։ Այդ մասին հայտնում է Reuters-ը։ Պիստորիուսի խոսքով՝ Թրամփի հայտարարությունները անհարգալից են հատկապես այն դաշնակիցների նկատմամբ, որոնք զոհվել են ռազմական գործողությունների ընթացքում։

«Սա պարզապես սխալ է և անհարգալից՝ այդպես խոսել զոհված դաշնակիցների մասին։ Այսօր այլ կերպ ներկայացնել իրականությունը՝ պարզապես սուտ է», — հայտարարել է Պիստորիուսը՝ մեկնաբանելով Թրամփի այն խոսքերը, թե եվրոպական դաշնակիցները Աֆղանստանում «մի փոքր հետ են քաշվել առաջնագծից»։

Գերմանիայի պաշտպանության նախարարը հայտնել է, որ այդ հարցը մտադիր է բարձրացնել ԱՄՆ պաշտպանության նախարար Փիթ Հեգսեթի հետ առաջիկա բանակցությունների ընթացքում։ Նրա խոսքով՝ Թրամփի կողմից ներողությունը կլիներ «պարկեշտության, հարգանքի և քաղաքական հեռատեսության» դրսևորում։ Ավելի վաղ Իտալիայի վարչապետ Ջորջա Մելոնին ևս կտրուկ արձագանքել էր Թրամփի հայտարարություններին՝ հիշեցնելով, որ Աֆղանստանում ՆԱՏՕ-ի երկրների գործողությունների ընթացքում զոհվել է 53 իտալացի զինծառայող, իսկ ավելի քան 700-ը վիրավորվել են։