Սյունիքը վտանգված է, իսկ կառավարությունն ու ԵԿՄ-ն՝ մեռելային թմբիրի մեջ (տեսանյութ)

Սյունիքը վտանգված է, իսկ կառավարությունն ու ԵԿՄ-ն՝ մեռելային թմբիրի մեջ

Սյունիքի մարզը Հայաստանի դարպասն ու ողնաշարն է, վերջին ամրոցն ու անվտանգության առանցքը։ Դրա մասին բազմիցս խոսել են թե՛ Մոնթեն, թե՛ Նժդեհը, թե՛ զորավար Անդրանիկն ու Լեոնիդ Ազգալդյանը։ Արցախը հանձնելուց հետո Սյունիքը դարձել է բազմակի անգամ ավելի խոցելի, և դրանից հետո օրեցօր հանգամանքներն այնպես են դասավորվում, որ Սյունիքում ռազմական էսկալացիան ավելի ու ավելի հավանական է դառնում։

Օրեր առաջ Արման Թաթոյանի բացահայտումը՝ Հայաստանի տարածքում թշնամու զորքի առաջխաղացման, ճանապարհների կառուցման և մեր տարածքում ինքնապաշտպանական դիրքեր ստեղծելու մասին, Պաշտպանության նախարարությունը սուտ է համարում և թույլ հիմնավորումներով փորձում է հերքել։

Իսկ իրականությունն այն է, որ 2021 թվականի մայիսի 12-ից, այո՛, ադրբեջանական զորքը նստած է Հայաստանի լեռնային գոտիներում՝ երեք ուղղություններով, և մինչ օրս նրանց դուրս մղելու կամ դիմադրության քայլեր անգամ չեն ձեռնարկվում։

Թաթոյանի պնդման հիմքում քարտեզներ ու լուսանկարներով փաստարկներ են, իսկ դա նշանակում է, որ Սյունիքի տարածաշրջանում վտանգն էլ ավելի է սաստկանում։ Սակայն իշխանությունը համառորեն հերքում է ու հերքում։

Ազատամարտիկներից շատերը իրավիճակին խորքային տիրապետում են, բայց հրաժարվում են տեսախցիկի առաջ խոսել․ այլևս դա ավելորդ են համարում։
Մանախը՝ Արթուր Այվազյանը, լավ է ճանաչում և՛ Թաթոյանին, և՛ ԵԿՄ ներկայիս նախագահին, ով «թելն առած վազում է՝ Փաշինյանի ասեղով անցկացնի», արժանահավատ է համարում Արման Թաթոյանի հաղորդած տեղեկությունը։

Ընդգծում է, որ Արման Թաթոյանին՝ որպես քաղաքական նոր ուժի հիմնադրի, չի համակրում, բայց հանուն ճշմարտության այսօր լիովին համամիտ է նախկին ՄԻՊ-ի հետ, ով իր կալանքի շրջանում իրեն որպես իրավապաշտպան չի արդարացրել։ Սա Մանախի անձնական մոտեցումն է՝ իր հետ կատարվածից հետո։

Մի կողմ թողնենք Ադրբեջանի կողմից այսօր պահպանվող ստատուս քվոն, որը ակնհայտորեն նվեր է իշխող ՔՊ-ին և անձամբ Փաշինյանին՝ նախընտրական շրջանում նրան քաջալերելու համար։ Բայց խաղաղության քարոզչության համատեքստից դուրս Ադրբեջանը գետնի վրա քաղաքականության մեջ ագրեսոր է։ Հետևաբար նոր դիրքերի ամրապնդումը, այն էլ ՀՀ սուվերեն տարածքի Սյունյաց բարձունքներում, բացարձակ ռիսկ է՝ նոր էսկալացիայի ու հարձակման համար։

Իսկ ի՞նչ կկատարվի մեր տարածաշրջանում, եթե Ադրբեջանը, այդուհանդերձ, թույլ տա Իսրայելին իրեն օգտագործել Իրանի դեմ՝ որպես ցամաքային տարածք։ Ի վերջո, քաղաքագետները 100 տոկոսով չեն բացառում Իսրայել–Ադրբեջան տանդեմը՝ Իրանը մոտիկից պատերազմով թուլացնելու համար։

Ուրեմն ի՞նչ է սպասվում Հայաստանին այս դեպքում…

ԵԿՄ-ի կազմում դեռ մնացել են կամային ու Փաշինյանի հետ գործարքի չգնացած մարտիկներ, և նրանք քիչ չեն։ Սակայն ԵԿՄ-ում դեռ Սասուն Միքայելյանն է ղեկավար, ով  առաջնահերթ իրեն ՔՊ-ական է դիրքավորել, որպեսզի հանկարծ Փաշինյանի հետ հողային ու փողային հարցերում կայծ չառաջանա։

Երկրապահներից շատերը համարում են, որ ի պաշտոնե Սասուն Միքայելյանն անթույլատրելի վարքագիծ է դրսևորում և անում է այնպիսի հայտարարություններ, որոնք բխում են բացառապես ՔՊ-ի քաղաքական շահերից։ Եվ եթե այսօր պատերազմ սկսվի, ԵԿՄ-ն չի կատարի իր առաքելությունը, քանի որ Սասուն Միքայելյանը թելով կախված է իր քաղաքական առաջնորդի քմահաճույքներից։