WSJ․ Թրամփին նախապես զգուշացրել էին Օրմուզի նեղուցի հնարավոր փակման մասին

ԱՄՆ նախագահ Դոնալդ Թրամփը դեռևս Իրանի դեմ ռազմական գործողությունից առաջ տեղեկացված էր, որ Թեհրանը կարող է փակել Օրմուզի նեղուցը, սակայն անտեսել է այդ նախազգուշացումները։ Այս մասին գրում է The Wall Street Journal-ը՝ հղում անելով իր աղբյուրներին։

Պարբերականի տվյալներով՝ պատերազմի մեկնարկից առաջ ԱՄՆ Զինված ուժերի շտաբների պետերի միացյալ կոմիտեի նախագահ գեներալ Դեն Քեյնը Թրամփին զգուշացրել էր, որ Իրանը կարող է փակել նեղուցը։ Ամերիկյան հետախուզությունը ենթադրում էր, որ Թեհրանը կարող է օգտագործել ականներ, անօդաչու սարքեր և հրթիռներ՝ խափանելու աշխարհի կարևորագույն «նավթային զարկերակը»։ Այնուամենայնիվ Թրամփը հաստատել է ռազմական գործողության մեկնարկը՝ վստահ լինելով, որ ԱՄՆ բանակը արագ կկարողանա լուծել նեղուցի հնարավոր փակման խնդիրը։

Սակայն, ըստ հրապարակման, պատերազմի երկու շաբաթ անց Օրմուզի նեղուցը դարձել է Իրանի ձեռքում գտնվող կարևոր ճնշման գործիք։ Հակամարտության ընթացքում արդեն զոհվել է 13 ամերիկացի զինծառայող, իսկ առնվազն 140 զինվոր վիրավորվել է։ Գործողությունը ԱՄՆ-ի համար շաբաթական արժենում է միլիարդավոր դոլարներ և կարող է երկրի տնտեսության համար ստեղծել ստագֆլյացիայի վտանգ։ Նշվում է նաև, որ Օրմուզի նեղուցով անցնում է աշխարհի նավթի մոտ 20 տոկոսը և հեղուկացված բնական գազի մատակարարումների շուրջ 30 տոկոսը։