Սև ծովում հարձակման է ենթարկվել եվրոպական երկրի նավթատար

Սև ծովում հարձակման է ենթարկվել հունական Maran Homer նավթատարը։ Այս մասին հայտարարել է Հունաստանի նավագնացության և կղզային քաղաքականության նախարար Վասիլիս Կիկիլիասը, հաղորդում է Skai հեռուստաալիքը։

Նավը դուրս էր եկել Սալոնիկի նավահանգստից և ուղևորվում էր դեպի Նովոռոսիյսկ։ Դեպքի պահին այն դատարկ էր և վարձակալված էր Chevron ընկերության կողմից։ Նախարարի խոսքով՝ հարձակման հետևանքով նավը շարունակել է շարժվել սեփական ընթացքով, իսկ շրջակա միջավայրի աղտոտում չի արձանագրվել։

Նավի վրա գտնվել են 24 նավաստի՝ 10 հույն, 13 ֆիլիպինցի և մեկ ռումինացի։ Կիկիլիասի տվյալներով՝ անձնակազմի բոլոր անդամները լավ են զգում, իսկ վնասվել է միայն նավի աջ կողմը։ Ավելի վաղ հաղորդվել էր, որ Ուկրաինան Ռուսաստանի ուղղությամբ արձակել է մոտ 90 անօդաչու սարք, որոնց մի մասը խոցվել է նաև Սև ծովի ջրատարածքում։