Օրբանը հայտարարել է, որ առանց ռուսական նավթի Եվրոպային սպասվում է երկարատև էներգետիկ ճգնաժամ

Հունգարիայի վարչապետ Վիկտոր Օրբանը հայտարարել է, որ Եվրոպան չի կարող հաղթահարել էներգետիկ ճգնաժամը առանց ռուսական նավթի մատակարարումների։ Այս մասին նա ասել է տեսաուղերձում՝ զգուշացնելով պատժամիջոցների պահպանման հնարավոր հետևանքների մասին, հաղորդում է ТАСС գործակալությունը։

Օրբանի խոսքով՝ Միացյալ Նահանգներն արդեն սկսել են մեղմել Ռուսաստանի նկատմամբ սահմանված որոշ սահմանափակումներ, մինչդեռ Բրյուսելում քաղաքականությունը մնում է անփոփոխ։ Նա նշել է, որ Եվրահանձնաժողովի և Գերմանիայի կառավարության կողմից ռուսական նավթի դեմ պատժամիջոցների աջակցությունը հանգեցրել է վառելիքի գների զգալի աճի։

Հունգարիայի վարչապետը ընդգծել է, որ ներկայում Եվրոպայում բենզինի մեկ լիտրի գինը մոտենում է 2 եվրոյի, Գերմանիայում այն արդեն անցնում է այդ շեմը, իսկ Նիդեռլանդներում գերազանցում է 2,5 եվրոն։ Օրբանը խոստացել է թույլ չտալ նման գների աճ Հունգարիայում։ Ավելի վաղ նա նաև հայտարարել էր, որ կասկածում է Ուկրաինայի և Եվրամիության հնարավոր համաձայնության մեջ՝ Հունգարիայում իշխանափոխության հասնելու նպատակով։