Ճապոնիան դիտարկում է ուկրաինական անօդաչուների գնումը

Ճապոնիան ուսումնասիրում է Ուկրաինայում արտադրված անօդաչու թռչող սարքերի ձեռքբերման և դրանք երկրի Ինքնապաշտպանության ուժերի սպառազինության մեջ ներառելու հնարավորությունը։ Այս մասին հայտնում է Kyodo գործակալությունը՝ հղում անելով իր աղբյուրներին։

Աղբյուրների տվյալներով՝ այդ նպատակով Տոկիոն կարող է ստորագրել զենքի փոխանցման մասին համաձայնագիր, որը նաև նախատեսում է ռազմական տեխնոլոգիաների հետ կապված գաղտնի տեղեկատվության պաշտպանություն։ Նման համաձայնագիրը կարող է նաև ճանապարհ բացել Ճապոնիայի կողմից Ուկրաինային սեփական արտադրության զինտեխնիկա մատակարարելու համար։

Վերջնական որոշումը կկայացվի այն բանից հետո, երբ ուկրաինական անօդաչուների տեխնիկական հնարավորությունները համեմատվեն այլ երկրների նմանատիպ սարքերի հետ։ Ավելի վաղ Ճապոնիայի կառավարությունը հայտարարել էր, որ միանում է ՆԱՏՕ-ի ստեղծած PUL ծրագրին՝ Ուկրաինային աջակցելու նպատակով։ Այդ ծրագրի շրջանակում Ճապոնիան նախատեսում է ամերիկյան արտադրության սարքավորումներ գնել և դրանք փոխանցել Կիևին։