«Բայց ես նրա սիրելի որդին չէի լինի». Զելենսկին Թրամփի մասին

Ուկրաինայի նախագահ Վլադիմիր Զելենսկին խոսել է ԱՄՆ նախագահ Դոնալդ Թրամփի հետ իր հարաբերությունների մասին և կատակով նշել, որ եթե իրեն պատկերացնի որպես նրա որդի, ապա ամենասիրելին չէր լինի։ Այս մասին նա հայտարարել է France Inter ռադիոկայանին տված հարցազրույցում։

Զելենսկին նշել է, որ իրենց միջև տարիքային տարբերությունը կարող է ստեղծել հարաբերությունների այնպիսի ձևաչափ, որը հիշեցնում է հոր և որդու հարաբերությունները։ «Մենք տարբեր սերունդներից ենք, և գուցե այդ պատճառով նա նման հարաբերություն է ակնկալում։ Բայց ես նրա սիրելի որդին չէի լինի», — ասել է Ուկրաինայի նախագահը։

Նա նաև ընդգծել է, որ Թրամփին չի կարող իր ընկեր անվանել։ Որպես օրինակ Զելենսկին նշել է Ֆրանսիայի նախագահ Էմանուել Մակրոնի հետ հարաբերությունները՝ նշելով, որ նրանք միասին երկար ճանապարհ են անցել և աջակցել են միմյանց դժվար պահերին։ Ավելի վաղ Զելենսկին նաև հայտարարել էր, որ Ուկրաինայի հակամարտության կարգավորման շուրջ բանակցությունները ձգձգվում են «Սանտա Բարբարա» սերիալի նման։