ԱՄՆ-ը վերանայում է առաջնահերթությունները․ Ուկրաինայի աջակցությունը երկրորդ պլանում՝ Իրանի պատերազմի ֆոնին

ԱՄՆ-ը բախվում է լուրջ դժվարությունների՝ միաժամանակ լիարժեք ուշադրություն հատկացնելու ինչպես Ուկրաինայի հակամարտությանը, այնպես էլ Իրանի դեմ ընթացող ռազմական գործողություններին։ Այս մասին ՏԱՍՍ-ին տված հարցազրույցում հայտարարել է թուրք անվտանգության փորձագետ Աբդուլլահ Ագարը՝ ընդգծելով, որ պատերազմի ժամանակ առաջնային նշանակություն ունի ուժերի կենտրոնացումը մեկ ուղղությամբ։

Նրա խոսքով՝ Վաշինգտոնը նախապես ենթադրում էր, որ Իրանի հետ դիմակայությունը հնարավոր կլինի արագ կարգավորել՝ այն պայմաններում, երբ Ուկրաինայի պատերազմի հիմնական բեռը փոխանցվել է եվրոպական երկրներին։ Սակայն զարգացումները ցույց են տվել, որ Իրանը արդյունավետ դիմադրում է և կարողանում է պահպանել իր դիրքերը՝ չնայած հասցվող հարվածներին։

Ագարը նշել է, որ ստեղծված իրավիճակում Ուկրաինային տրամադրվող ռազմական աջակցությունը աստիճանաբար մղվում է երկրորդ պլան։ Որպես օրինակ նա նշել է, որ Իսրայելում տեղակայված ամերիկյան պահեստներից Ուկրաինա փոխանցված հրետանային արկերը հետ են վերադարձվել՝ Մերձավոր Արևելքում ռազմական գործողությունների ակտիվացման պատճառով։ Նրա գնահատմամբ՝ Իրանի ուղղությունը ներկայում առաջնահերթ է ԱՄՆ-ի համար՝ հատկապես սպառազինության և զինամթերքի բաշխման տեսանկյունից։