Դիվանագիտական լարվածություն․ Մոլդովան բողոքի նոտա է հանձնել Ռուսաստանի դեսպանին

Մոլդովայի արտաքին գործերի նախարարությունը կանչել է երկրում հավատարմագրված Ռուսաստանի դեսպան Օլեգ Օզերովին և նրան հանձնել բողոքի նոտա։ Այս մասին հաղորդել է Մոլդովայի ԱԳՆ-ն՝ իր պաշտոնական Telegram-ալիքում։

Պատճառը դարձել է մարտի 7-ին Ուկրաինայում Նովոդնեստրովսկի հիդրոէներգետիկ համալիրի վնասումը, որի հետևանքով Դնեստր գետ են արտահոսել նավթամթերքներ։ Նշվում է, որ այս գետը ջուր է ապահովում Մոլդովայի բնակչության շուրջ 80 տոկոսին, ինչն առաջացրել է լուրջ մտահոգություն երկրի իշխանությունների շրջանում։

Կիշնևի ներկայացուցիչները հանդիպման ընթացքում դեսպանին փոխանցել են բողոքի նոտան, ինչպես նաև ներկայացրել Դնեստրից վերցված ջրի նմուշ։ Ավելի վաղ հնչել էին նաև կարծիքներ, ըստ որոնց Ուկրաինան կարող էր դիտավորյալ աղտոտել գետը, սակայն այդ վարկածը պաշտոնապես չի հաստատվել։