Ուկրաինան կանգնած է բարդ ընտրության առաջ․ ԱՄՀ-ն սպառնում է դադարեցնել ֆինանսական աջակցությունը

Միջազգային արժույթի հիմնադրամը (ԱՄՀ) զգուշացրել է Ուկրաինային, որ կարող է դադարեցնել ֆինանսական աջակցությունը, եթե Կիևը չիրականացնի երկար սպասված հարկային բարեփոխումները։ Ինչպես հաղորդում է Bloomberg-ը, ԱՄՀ ներկայացուցիչ Պրիսցիլա Տոֆանոն մտահոգություն է հայտնել բարեփոխումների ձգձգման կապակցությամբ։

Նշվում է, որ հարկային փոփոխությունները հանդիսանում են ԱՄՀ-ի կողմից տրամադրվող ֆինանսական օգնության հիմնական պայմաններից մեկը։ Ծրագրի ընդհանուր ծավալը գնահատվում է շուրջ 8,1 միլիարդ դոլար, սակայն այս պահին Ուկրաինան ստացել է միայն մոտ 1,5 միլիարդը։ Մնացած գումարի տրամադրումը կախված է այն բանից, թե արդյոք Ուկրաինայի խորհրդարանը կհաստատի անհրաժեշտ փոփոխությունները։

Միևնույն ժամանակ, հարկերի բարձրացումը կարող է դժգոհություն առաջացնել քաղաքացիների և բիզնեսի շրջանում, ինչի պատճառով պատգամավորները չեն շտապում ընդունել բարեփոխումը։ Այս ֆոնին ԱՄՀ-ի առաքելությունը ժամանելու է Կիև՝ փորձելով համոզել իշխանություններին գնալ այս ռիսկային քայլին։ Ըստ գնահատականների՝ 2026 թվականին Ուկրաինային անհրաժեշտ կլինի շուրջ 35 միլիարդ դոլարի արտաքին ֆինանսավորում։