Փորձագետը չի բացառում Թրամփի կողմից նոր ռազմական գործողություն Կուբայի դեմ

ԱՄՆ նախագահ Դոնալդ Թրամփը տեսականորեն կարող է ռազմական գործողություն սկսել Կուբայի դեմ, սակայն կփորձի խուսափել այդ սցենարից։ Այս մասին հայտարարել է Ռուսաստանի ԳԱ Լատինական Ամերիկայի ինստիտուտի ավագ գիտաշխատող Մագոմեդ Կոդզոևը։

Փորձագետի խոսքով՝ ԱՄՆ-ը ներկայումս կենտրոնացած է Իրանի շուրջ հակամարտության վրա, սակայն այդ ճակատում անհաջողության դեպքում Թրամփը կարող է գնալ կտրուկ քայլերի՝ փորձելով հասնել քաղաքական հաղթանակի։ Միևնույն ժամանակ նշվում է, որ Կուբայի ուղղությամբ ուժային գործողությունները կարող են ունենալ լուրջ հետևանքներ հենց ԱՄՆ-ի համար՝ հատկապես հնարավոր հումանիտար ճգնաժամի դեպքում։

Կոդզոևը նաև ընդգծել է, որ Թրամփի վարչակազմում կան ազդեցիկ ուժեր, որոնք աջակցում են Կուբայի նկատմամբ կոշտ քաղաքականությանը, սակայն նույնիսկ նրանք զգուշանում են ռազմական էսկալացիայից։ Նախկինում Թրամփը հայտարարել էր, որ Իրանի ուղղությամբ գործողություններից հետո Վաշինգտոնը կարող է կենտրոնանալ նաև Կուբայի վրա։