«Մեղրաձոր Գոլդ»-ը՝ գյուղացիների պահանջի վերաբերյալ

Ինչպես արդեն տեղեկացրել էինք, երեկ նախագահական նստավայրի դիմաց բողոքի ցույց էին անցկացնում Կոտայքի մարզի Մեղրաձոր գյուղի մի խումբ գյուղացիներ, ովքեր պահանջում էին գյուղի տարածքում չկառուցել «Մեղրաձոր Գոլդ» ընկերությանը պատկանող փակ եղանակով ոսկու կորզման արտադրամաս, որի ընթացքում օգտագործվելու է սահմանափակ քանակությամբ ցիանիդ: Ըստ գյուղացիների ձուլարանի կառուցումը կարող է վտանգ սպառնալ տեղի բնակիչների առողջությանը:

Այս առթիվ Lurer.com-ը զրուցեց «Մեղրաձոր Գոլդ» ընկերության բաժնետեր Վարդան Մարգարյանի հետ, ով իր խոսքում նշեց. «Մեղրաձորի հանքավայրը համարվում էր ոչ հեռանկարային, որովհետև այն նախապատրաստական մեծ աշխատանք էր պահանջում: Ես այն վարձակալությամբ աշխատեցնելու իրավունքները ստացա և սկսեցի աշխատեցնել 2011 թվականի ապրիլից: Առաջին հանքաքարը ստացել եմ նոյեմբերին, և այդպես սկիզբ դրվեց «Արարատի» հետ մեր պայմանագրին: Ես հանքաքարը պետք է ուղարկեմ այնտեղ: Այնուհետև՝ 2012-ի օգոստոսին, ֆիրման ինձ նոր առաջարկ արեց. ոսկու գումարը տալու փոխարեն ես, սկսած 2013-ի հունվարից, հանքաքարը պետք է մեքենաներով տեղափոխեմ և վաճառեմ նրանց: Համաշխարհային պրակտիկայում 50-ից բարձր տոկոս է գալիս հանքաքարին, քանի որ պարունակությունը ցածր է՝ 2 գրամ, 1.5, 2,2: Իմ հաշվարկները ցույց տվեցին, որ այն ինձ համար ձեռնտու չէ, քանի որ տրանսպորտային ծախսերը 2,5-3 անգամ ավելանում են, իսկ հանքաքարը վաճառելով՝ ես չեմ տեղավորվում ինքարժեքի մեջ: Ես մտածեցի, որ ես ինքս պետք է անեմ այդ ամենը, ու դիմեցի գիտահետազոտական ինստիտուտի աշխատակիցներին, որպեսզի ինձ համար մի պրոյեկտ կազմեն, որով ես կարողանամ փակ համակարգով ոսկու կորզում ապահովել. արտադրողականությունը պետք է լիներ ամսական 600 տոննա»:

Վարդան Մարգարյանի խոսքով՝ երբ պրոյեկտը պատրաստ է եղել, սկսել են դրա վերաբերյալ հասարակական լսումներ կազմակերպել: Վերջինիս բնորոշմամբ՝ հասարակական լսումները նորմալ են անցել, մարդիկ հիմնականում կողմ են եղել առաջարկված պրոյեկտին, դեմ է եղել մի քանի հոգի միայն:

«Այդ պրոյեկտը գիտահետազոտական ինստիտուտի աշխատակիցներն են կազմել, և այն համաշխարհային պրակտիկայում մեծ տարածում ունի: Ճիշտ է, ցիանիդացում է արվում, քանի որ դա ամենաէժան տարբերակն է, վերջին փուլում խոնավության մեջ է ոսկին կորզվում, իսկ խոնավությունն անընդհատ պտտվում է: Ոչ մի արտահոսք տեղի չի ունենում,-ասաց Վարդան Մարգարյանը և հավելեց,- հրավիրված մասնագետը գյուղացիների բոլոր հարցերին պատասխանեց, բայց, միևնույն է, իրենք չեն հավատում: Անգամ իրենց կողմից հրավիրված մասնագետն է կողմ արտահայտվել, բայց նրանք սկսեցին հայտարարել, թե անգամ նրանց կողմից բերված մասնագետն ու գյուղապետն են իմ օգտին գործում: Նրանք չեն խորանում պրոյեկտի բուն էության մեջ»:

Ինչպես տեղեկացրեց նա, գյուղի բնակիչները պրոյեկտը երկրորդ անգամ ուղարկել են քննարկման ինչ-որ գիտնականի մոտ, և նա նույնպես կողմ է արտահայտվել:

«Ես չեմ ուզում, որ իմ անունը հոլովվի: Ես նրանց ասել եմ՝ եթե համաձայն չեք, կանգնե՛ք, ասե՛ք՝ համաձայն չենք։ Ես հենց այնպես գործունեություն չեմ ծավալի, այդ խոսակցությանը վերջ տանք: Նրանք համաձայնություն տվեցին,-ասում է Վարդան Մարգարյանը:-Ներկայումս 200 աշխատող կա, որից 116-ը Մեղրաձորի բնակիչներ են, աշխատողների թիվը կարող էր ավելանալ ևս 41-ով: Այդ իսկ պատճառով ցանկացել եմ Մեղրաձորում կառուցել «Մեղրաձոր Գոլդ»-ը, որպեսզի նոր աշխատատեղեր բացվեն: Ես բազմիցս ասել եմ՝ եթե չեք ցանկանում, ես մեկ այլ տեղ կարող եմ իմ գործունեությունը ծավալել, այնտեղ, որտեղ որ կառավարությունը որոշի, բայց ամեն դեպքում իրենց համաձայնությունը տվել են: Չգիտեմ՝ ինչու է ամեն ինչ այսքան խառնվել: Եթե ամբողջ գյուղն ասեր՝ չենք ուզում, ես այդ ծրագիրը գյուղի հետ չէի կապի։ Միայն մի բան կարող եմ ասել՝ իրենց պահանջները գիտականորեն հիմնավորված չեն, հավաքված ստորագրությունների մեջ էլ կեղծերը կան»,-իր խոսքը եզրափակեց Վարդան Մարգարյանը:

Նելլի Ավետիսյան