Գիտնականները պարզել են՝ ինչ մթերքներ են պաշտպանում լյարդը վտանգավոր հիվանդությունից

Մրգերն ու ընկույզները կարող են օգնել պաշտպանել լյարդը ոչ ալկոհոլային ճարպային հիվանդությունից։ Այս եզրակացությանն են եկել Edith Cowan University-ի հետազոտողները, որոնց աշխատանքի արդյունքները հրապարակվել են Molecular Nutrition and Food Research գիտական հանդեսում։

Գիտնականները հատուկ ուշադրություն են դարձրել էլագաթթվին՝ բնական միացությանը, որը պարունակվում է նռան, հատապտուղների, խաղողի և ընկույզի մեջ։ Կենդանիների վրա անցկացված փորձերը ցույց են տվել, որ այն կարող է նվազեցնել լյարդի վնասվածքները և դանդաղեցնել հիվանդության զարգացումը։ Նշվում է, որ ոչ ալկոհոլային ճարպային լյարդային հիվանդությունը լայն տարածում ունի և հաճախ կապված է ավելորդ քաշի, շաքարախտի և բարձր զարկերակային ճնշման հետ՝ ծանր դեպքերում հանգեցնելով ցիռոզի կամ քաղցկեղի։

Միևնույն ժամանակ հետազոտությունը բացահայտել է նաև ինուլինի՝ տարածված սննդային հավելման հակասական ազդեցությունը։ Պարզվել է, որ առանց էլագաթթվի համադրության այն կարող է նպաստել քաշի ավելացմանը, արյան մեջ շաքարի մակարդակի բարձրացմանը և լյարդի վիճակի վատթարացմանը։ Հետազոտության հեղինակները շեշտում են, որ կարևոր է ոչ միայն սննդի տեսակը, այլ նաև դրա ճիշտ համադրությունը։