Գիտնականները պարզել են՝ ինչպես նվազեցնել քնի պակասի վնասը ուղեղի վրա

Գիտնականները հայտնաբերել են, որ կրեատինի միանվագ ընդունումը կարող է մասամբ նվազեցնել ուշադրության և մտածողության վատթարացումը քնի պակասի պայմաններում։ Հետազոտության արդյունքները հրապարակվել են Nutrients հանդեսում։

Փորձին մասնակցել են 29 առողջ մեծահասակներ, որոնք 21 ժամ չեն քնել։ Տարբեր փորձաշրջաններում նրանք ստացել են կամ կրեատին, կամ պլացեբո, որից հետո անցել են մի շարք թեստեր՝ ստուգելու ռեակցիան, հիշողությունը, տրամաբանությունը և տեղեկատվության մշակման արագությունը։

Արդյունքները ցույց են տվել, որ կրեատինը ամբողջությամբ չի վերացնում հոգնածությունը, սակայն օգնում է ուղեղին աշխատել ավելի կայուն։ Մասնակիցները ավելի լավ արդյունքներ են ցուցաբերել ուշադրության, լեզվական և հաշվարկային առաջադրանքներում՝ մինչև 12 տոկոս բարելավմամբ։ Գիտնականները նշում են, որ կրեատինը մասնակցում է բջջային էներգետիկ գործընթացներին և կարող է աջակցել ուղեղին ծանրաբեռնվածության ժամանակ, սակայն ընդգծում են, որ անհրաժեշտ են լրացուցիչ ուսումնասիրություններ։