Բժիշկը նշել է մթերքները, որոնք արագացնում են օրգանիզմի ծերացումը

Դիետոլոգ և էնդոկրինոլոգ Անաստասիա Չեռնիխը զգուշացրել է, որ որոշ մթերքներ կարող են արագացնել օրգանիզմի ծերացումը և վնասել առողջությանը։ Այդ մասին նա պատմել է aif.ru-ին տված հարցազրույցում։

Բժշկի խոսքով՝ ամենավտանգավորներից են մեծ քանակությամբ շաքար պարունակող մթերքները։ Նրա բացատրությամբ՝ քաղցրը բարձրացնում է ինսուլինի մակարդակը, ինչի հետևանքով օրգանիզմում ավելանում է սթրեսի հորմոն համարվող կորտիզոլի արտադրությունը։ Արդյունքում մարդը կարող է բախվել քրոնիկ հոգնածության և մշտական սթրեսի հետ։

Չեռնիխը նաև խորհուրդ է տվել չփոխարինել սովորական քաղցրավենիքը «առողջ» առանց շաքարի բատոնչիկներով, քանի որ դրանցում հաճախ օգտագործվում է ֆրուկտոզա։ Նրա խոսքով՝ ֆրուկտոզայի ավելցուկը կարող է հանգեցնել ավելորդ քաշի և լյարդի ճարպակալման։ Բացի այդ, բժիշկը նշել է, որ ճարպոտ և շատ տապակված ուտեստները ևս արագացնում են ծերացման գործընթացը՝ վնասելով անոթները, սիրտն ու երիկամները և նպաստելով կնճիռների առաջացմանը։