Գիտնականները հայտարարել են, որ ուղեղի ծերացումը անխուսափելի չէ

Գիտնականները եկել են եզրակացության, որ տարիքային փոփոխությունները պարտադիր չեն հանգեցնում ուղեղի աշխատանքի վատթարացման, և մարդու ճանաչողական կարողությունները կարող են բարելավվել նույնիսկ ծեր տարիքում։ Հետազոտության արդյունքները հրապարակվել են Scientific Reports գիտական ամսագրում։

Ուսումնասիրության շրջանակում գիտնականները երեք տարվա ընթացքում հետևել են 19-ից 94 տարեկան գրեթե 4 հազար մարդու առողջական վիճակին։ Պարզվել է, որ ուղեղի համար օգտակար ամենօրյա սովորությունները, այդ թվում՝ օրական ընդամենը 5-15 րոպեանոց մտավոր վարժությունները, նպաստում են հիշողության, մտածողության, հուզական կայունության և ընդհանուր ճանաչողական վիճակի բարելավմանը։

Հետազոտության հեղինակները նշել են, որ առավել նկատելի արդյունքներ գրանցվել են այն մարդկանց մոտ, ովքեր սկզբում ունեցել են ուղեղի առողջության ավելի ցածր ցուցանիշներ։ Միաժամանակ դրական փոփոխություններ արձանագրվել են բոլոր տարիքային խմբերում՝ ներառյալ 70 և 80 տարեկանից բարձր մասնակիցների շրջանում։ Գիտնականները նաև ընդգծել են, որ ուղեղի առողջությունն ավելի շատ կախված է օգտակար սովորությունների կանոնավորությունից, քան միայն տարիքից, և ճանաչողական ունակությունները հնարավոր է պահպանել ու զարգացնել ամբողջ կյանքի ընթացքում։