ՀՀ-ն պետք է հստակեցնի՝ ԵՄ, թե՞ ԵԱՏՄ․ Պուտին

ՌԴ նախագահ Վլադիմիր Պուտինը հայտարարել է, որ եթե հայ ժողովրդի համար շահավետ լինի որևէ որոշում, ապա Ռուսաստանը դեմ չի լինի, սակայն Երևանը պետք է հնարավորինս շուտ հստակեցնի՝ ցանկանում է շարունակել ինտեգրումը ԵԱՏՄ-ի շրջանակում, թե ընտրելում է ԵՄ ուղին։

«Հայաստանի՝ ԵՄ-ին միանալու ծրագրերը պահանջում են հատուկ քննարկում։ ՌԴ-ն կաջակցի այն ամենին, ինչը բխում է հայ ժողովրդի շահերից։ Տրամաբանական կլինի, որ ՀՀ-ն հանրաքվե անցկացնի ԵՄ-ին կամ ԵԱՏՄ-ին միանալու վերաբերյալ։ Հայաստանը զգալի առավելություններ է ստանում ԵԱՏՄ-ի շրջանակներում»,- ասել է նա։

Պուտինի խոսքով՝ 2025 թվականին Հայաստանի և Ռուսաստանի միջև առևտրաշրջանառությունը կազմել է շուրջ 7 միլիարդ դոլար, ինչը, նրա գնահատմամբ, զգալի ցուցանիշ է՝ հաշվի առնելով Հայաստանի ՀՆԱ-ի ծավալը։ Նա ընդգծել է, որ Հայաստանը ԵԱՏՄ շրջանակում ստանում է մի շարք տնտեսական առավելություններ՝ գյուղատնտեսության, վերամշակող արդյունաբերության, մաքսային և միգրացիոն ոլորտներում։

ՌԴ նախագահը նշել է, որ Հայաստանի իշխանությունները կարող են նույնիսկ հանրաքվե անցկացնել՝ հասկանալու քաղաքացիների ընտրությունը, ինչից հետո կողմերը, ըստ նրա, կկարողանան գնալ «փափուկ, ինտելիգենտ և փոխշահավետ բաժանման» ճանապարհով։

«Երևանը պետք է հնարավորինս շուտ հստակեցնի՝ ցանկանում է մասնակցել ԵՄ-ին, թե ԵԱՏՄ-ին, և այդ դեպքում հնարավոր կլինի քաղաքակիրթ ապահարզան»,- ասել է Պուտինը։

Անդրադառնալով Ուկրաինային՝ Պուտինը հայտարարել է, որ ուկրաինական ճգնաժամը, իր խոսքով, սկսվել է ԵՄ-ին անդամակցելու կամ անդամակցելու փորձերից, ինչը նա անվանել է «առաջին փուլ»։