Բացատրվել է՝ ինչ սկզբունքով են ընտրում պացիենտներին նոր հակաքաղցկեղային պատվաստանյութի փորձարկման համար

Ռուսաստանում մշակվող անհատականացված հակաքաղցկեղային «Նեոօնկովակ» պատվաստանյութի փորձարկման համար պացիենտներին ընտրում են ուռուցքում հայտնաբերված մուտացիաների քանակի հիման վրա։ Այդ մասին հայտնել է Գամալեայի անվան կենտրոնի ղեկավար, ՌԴ ԳԱ ակադեմիկոս Ալեքսանդր Գինցբուրգը։

Նրա խոսքով՝ արդեն ընտրվել է երկրորդ պացիենտը, և ընտրության չափանիշը նույնն է եղել, ինչ առաջին դեպքում՝ ուռուցքում մուտացիաների բարձր քանակը։ Գինցբուրգի խոսքով՝ նման պայմաններում մՌՆԹ տեխնոլոգիայով մշակվող պատվաստանյութը տեսականորեն կարող է ավելի արդյունավետ արձագանք առաջացնել։

Ակադեմիկոսը նշել է, որ երկրորդ պացիենտի մոտ արձանագրվել է մոտ 30 մուտացիա մեկ միլիոն նուկլեոտիդի հաշվով, ինչը գնահատվում է որպես բարձր ցուցանիշ։ Նրա խոսքով՝ նման դեպքերում մասնագետների համար ավելի հեշտ է ընտրել անհատականացված բուժման տարբերակը։

Գինցբուրգը նաև նշել է, որ երկու պացիենտների ուռուցքներն ունեն այսպես կոչված «տաք միկրոմիջավայր», այսինքն՝ օրգանիզմի իմունային համակարգն արդեն որոշ ակտիվություն է ցուցաբերում տվյալ հատվածում։

«Նեոօնկովակը» անհատականացված մՌՆԹ հակաուռուցքային պատվաստանյութ է․ այն մշակվում է յուրաքանչյուր պացիենտի ուռուցքի գենետիկական առանձնահատկությունների հիման վրա՝ նպատակ ունենալով օգնել իմունային համակարգին ճանաչել և պայքարել քաղցկեղային բջիջների դեմ։