Այն դիրքում չեմ լինի, որ թույլ տամ ինձ ներեն կամ չներեն, ինձ կարող են հավատալ կամ չհավատալ. Եղիշե Մելիքյան

Այսօր Վազգեն Սարգսյանի անվան «Հանրապետական» մարզադաշտում կկայանա Հայաստան-Մոլդովա ընկերական հանդիպումը։

Նախախաղային ասուլիսում Հայաստանի ազգային հավաքականի գլխավոր մարզիչ Եղիշե Մելիքյանը նշել է, որ նախորդ խաղից հետո կա որոշակի հոգնածություն, բայց թիմի տրամադրվածությունը բարձր մակարդակի է։

«Փոփոխություններ ենք արել, դաշտում նորեկներ կտեսնեք, որոնք առաջին անգամ են մեկնարկային կազմում լինելու։ Հասկանում եմ, որ մեզ հաղթանակ է  պետք, բայց մենք ունենք ուղղություն, նպատակներ, իսկ երբ մենք մտածենք միայն հաղթանակի մասին և չփորձարկենք, ճիշտ չի լինի։ Ես էլ եմ ուզում, որ մենք հաղթենք, բայց ինձ համար առաջնահերթը շատ բան հասկանալն է այս ընկերական խաղերում։ Գնացել եմ նման ռիսկերի, եթե արդարացվի, մեզ մոտ ավելի լավ կլինի աշունը, իսկ եթե չարդարացվի, փոփոխության և մտածելու ժամանակ ունենք։

Վստահ եմ՝ մենք ճիշտ ուղու վրա ենք»,- ասել է Մելիքյանը։

Նա նաև նշել է. «Ինձ պետք չէ ներել: Ես լավ գիտեմ իմ գործը և տեղը: Այն դիրքում չեմ լինի, որ թույլ տամ ինձ ներեն կամ չներեն: Ինձ կարող են հավատալ կամ չհավատալ. եթե հավատում են՝ կաշխատեմ, եթե չեն հավատում՝ մեկ օր չեմ մնա։ Ես գործ կորցնելուց չեմ վախենում»։ 

Ասուլիսին ներկա կիսապաշտպան Նարեկ Գրիգորյանն ասաց, որ լավ մարզավիճակում է, պատրաստ է  խաղին. «Թիմը լավ պատրաստվել է, գիտենք՝ դաշտում ինչ պետք է անենք։ Ամեն ինչ անելու ենք ուրախացնելու մեր երկրապագուներին հաղթանակով»։ 

Ըստ նրա, Մոլդովայի հավաքականը լավ հակառակորդ է, ուսումնասիրել ենուժեղ և թույլ կողմերը. «Օգտագործելով մեր ուժեղ կողմերը՝ փորձելու ենք հասնել դրական արդյունքի»։