Ուկրաինան և Լատվիան համաձայնագիր են ստորագրել անօդաչու սարքերի համատեղ արտադրության մասին

Ուկրաինան և Լատվիան ստորագրել են Drone Deal անվանումը ստացած համաձայնագիրը, որը նախատեսում է անօդաչու սարքերի համատեղ արտադրության զարգացում։ Այդ մասին հայտարարել է Ուկրաինայի նախագահ Վլադիմիր Զելենսկին, փոխանցում է ТСН-ը։

Զելենսկու խոսքով՝ համաձայնագիրը ներառում է համատեղ պաշտպանության ամրապնդման և արտադրական համագործակցության կոնկրետ քայլեր։ Նա ընդգծել է, որ Ուկրաինայի կուտակած փորձն ու տեխնոլոգիական կարողությունները կարող են օգտակար լինել նաև գործընկեր երկրների պաշտպանունակության բարձրացման համար։

Ավելի վաղ Էստոնիայի նախագահ Ալար Կարիսը հայտարարել էր, որ առաջիկա ամռանը կարող է հնարավորություն ստեղծվել Ուկրաինայի հարցով Ռուսաստանի հետ երկխոսության համար։ Միաժամանակ Զելենսկին նախկինում հանդես էր եկել առաջարկով, ըստ որի՝ Ուկրաինան պատրաստ է համագործակցել Բալթյան երկրների հետ անօդաչու համակարգերի ոլորտում։