Քաղաքագետը բացատրել է՝ ինչու է Աբրամովիչը ներգրավված Ուկրաինայի շուրջ բանակցային շփումներում

Ռուս գործարար Ռոման Աբրամովիչի մասնակցությունը Ուկրաինայի հակամարտության կարգավորման շուրջ շփումներին կարող է պայմանավորված լինել նրա ազդեցությամբ և տարբեր քաղաքական կենտրոններում ընդունելի լինելու գործոնով։ Այդ կարծիքն է հայտնել «Առաջադեմ քաղաքականության հիմնադրամի» տնօրեն Օլեգ Բոնդարենկոն։

Քաղաքագետի խոսքով՝ Աբրամովիչը կարող է ունենալ այնպիսի կապեր և հեղինակություն, որոնք թույլ են տալիս նրան լսելի լինել ոչ միայն Մոսկվայում, այլ նաև Կիևում, Լոնդոնում և այլ քաղաքական կենտրոններում։ Նրա գնահատմամբ՝ խոշոր կապիտալի ազդեցությունը միջազգային գործընթացներում շարունակում է պահպանվել։

Միաժամանակ Բոնդարենկոն նշել է, որ հակամարտության արդյունավետ կարգավորման համար անհրաժեշտ են կանոնավոր պաշտոնական շփումներ՝ երրորդ երկրների հարթակներում և խորհրդականների կամ պետական ներկայացուցիչների մակարդակով։ Նրա կարծիքով՝ եթե նման գործընթացներում ներգրավվում են բիզնես ներկայացուցիչներ, դա կարող է վկայել հաղորդակցության այլ արդյունավետ ուղիների սահմանափակ լինելու մասին։ Ավելի վաղ հայտնի էր դարձել, որ Վլադիմիր Զելենսկին անձնական հանդիպման ընթացքում փոխանցել էր իր դիրքորոշումը Դոնբասի հարցում Ռոման Աբրամովիչին։