Իմ փորձի ընթացքում հանդիպել եմ միայն մեկին, ով ամեն ինչ ինքնուրույն է անում․ Ինտերի տնօրենը՝ Մխիթարյանի մասին

Հենրիխ Մխիթարյանը ևս մեկ մրցաշրջանով կերկարաձգի ավարտվող պայմանագիրը Միլանի «Ինտերի» հետ, սակայն այս համաձայնագրի շուրջ խիստ ուշագրավ մանրամասներ են ի հայտ եկել․ գրում է Armsport.am կայքը։

Միլանյան ակումբի մարզական տնօրեն Պիերո Աուզիլիոն բացահայտել է, որ հայ ֆուտբոլիստը բանակցությունները վարում է ամբողջությամբ ինքնուրույն՝ առանց որևէ գործակալի միջամտության։

«Իմ ողջ փորձի ընթացքում հանդիպել եմ միայն մեկ ֆուտբոլիստի, ով ամեն ինչ անում է ինքնուրույն և ամեն առումով միջինից բարձր մակարդակի վրա է՝ լինի դա խաղադաշտում, դրանից դուրս, թե սեփական կարիերայի կառավարման հարցում։ Նա կմնա «Ինտերում», և դուք արդեն հասկացաք, թե ում մասին է խոսքը։ Հայը, ով սլանում է գնացքի պես, իսկապես այլ հարթության մեջ է»,- Աուզիլիոյի խոսքն է մեջբերում La Gazzetta dello Sport-ը։

Աուզիլիոյի խոսքերից հստակեցվում է երկու հիմնական դրվագ։ Նախ, Մխիթարյանը շուտով պաշտոնապես կստորագրի ևս մեկ տարվա պայմանագիր, ինչը, ամենայն հավանականությամբ, կլինի նրա վերջին մրցաշրջանը նախքան պրոֆեսիոնալ կարիերան ավարտելը։

Երկրորդ՝ «հայը, ով սլանում է գնացքի պես» (այսպես են նրան կնքել Աուզիլիոն, թիմակիցներն ու երկրպագուները, խմբ․), ինքն է վարել բանակցությունները՝ առանց հատուկ պահանջների։ Նա հոժարակամ ընդունել է աշխատավարձի բնականոն նվազեցումը ներկայիս համաձայնագրի համեմատ (այժմ նա ստանում է տարեկան 4 միլիոն եվրո մաքուր եկամուտ), որի ժամկետը լրանում է այս տարվա հունիսի 30-ին։

Մխիթարյանը ղեկավարությանը պայմաններ չի թելադրել և ներկայացել է բանակցություններին, որոնք նախաձեռնել էր Քրիստիան Կիվուն։ Վերջինս հայ կիսապաշտպանին առանցքային ֆիգուր է համարում նաև հաջորդ մրցաշրջանի համար։

Հաջորդ հունվարին Հենրիխը կդառնա 38 տարեկան, և հենց նրա ֆուտբոլային հասունությունն է դարձել «ներաձուրիների» կազմում մնալու գլխավոր գրավականը։ Մխիթարյանը երկար մտածել է հնարավոր հեռանալու և տարբերակների շուրջ, սակայն ի վերջո որոշել է ընդառաջել Կիվուի ցանկությանը՝ շարունակել համագործակցությունը։

Ակումբում բարձր են գնահատում ոչ միայն Մխիթարյանի խաղային ինտելեկտը, այլև նրա մարդկային տեսակը։ Սպասվում է, որ նա յուրօրինակ «ուղեկցող-մենթորի» դեր կստանձնի տրանսֆերային պատուհանի ընթացքում թիմը համալրող նորեկների և երիտասարդների համար։ Պայմանագրի երկարաձգումը բոլորի համար տրամաբանական և հեշտ որոշում էր. այժմ գլխավոր նպատակը Միլանում ֆուտբոլային կարիերան գեղեցիկ ու հաղթական նոտայով եզրափակելն է։