Ռուսաստանը խեցգետնի արտահանումը հասցրել է ռեկորդային մակարդակի

2026 թվականի հունվարից մայիս ընկած ժամանակահատվածում Ռուսաստանը արտահանել է շուրջ 930 միլիոն դոլարի խեցգետին։ Այդ մասին հայտնում է «Ինտերֆաքս»-ը՝ հղում անելով «Ագրոէքսպորտ»-ի տվյալներին։

Խոսքը վերաբերում է գրեթե 34 հազար տոննա արտադրանքի մատակարարմանը, ինչը 11 տոկոսով գերազանցում է նախորդ տարվա նույն ժամանակահատվածի ցուցանիշը։ Միաժամանակ արտահանման եկամուտներն աճել են 26 տոկոսով։ Նշվում է, որ թե՛ ծավալների, թե՛ ֆինանսական արդյունքների տեսանկյունից սա ռեկորդային ցուցանիշ է տարվա առաջին հինգ ամիսների համար։

Հիմնական արտահանման շուկան շարունակում է մնալ Չինաստանը, որի բաժինը կազմում է արտահանման ընդհանուր հասույթի շուրջ 61 տոկոսը։ Երկրորդ տեղում Հարավային Կորեան է՝ 38 տոկոս մասնաբաժնով։ Ըստ ներկայացված տվյալների՝ 2026 թվականի առաջին չորս ամիսներին Չինաստան ռուսական կենդանի խեցգետնի ներմուծումը զգալի աճ է գրանցել, իսկ ընդհանուր առմամբ ռուսական ձկան և ծովամթերքի արտահանումը դեպի Չինաստան ևս աճել է ինչպես ծավալներով, այնպես էլ արժեքային արտահայտությամբ։